Tilkynningum vegna heimilisofbeldis hefur fjölgaði milli mánaða samkvæmt mánaðarskýrslu lögreglunnar á höfuðborgarsvæðinu. Í mars bárust LRH 60 tilkynningar um heimilisofbeldi en þrátt fyrir fleiri tilkynningar hefur fjöldi þeirra kvenna sem leita í Kvennaathvarfið ekki aukist.

„Við höfum bent á það að í aðstæðum sem þessum væri annað ólíklegt en að heimilisofbeldi myndi aukast,“ segir Sigþrúður Guðmundsdóttir, framkvæmdastjóri Kvennaathvarfsins, og vísar þar til COVID-19 faraldursins. „Við bjuggumst samt ekki við því að fleiri konur myndu leita til okkar af því að aðstæður eru þannig að erfitt er að fara að heiman og slíta sambandi akkúrat núna.“

Sigþrúður nefnir í því samhengi að efnahagslegar aðstæður líkt og séu nú í þjóðfélaginu geti verið hindrun fyrir konur til þess að slíta ofbeldissambandi. „Það að fara í Kvennaathvarfið er yfirleitt fyrsta skrefið og svo halda konurnar út í nýtt líf þar sem þær hafa slitið sambandi við ofbeldismanninn. Óvissa í atvinnumálum og áhyggjur af fjármálum getur haft mikil áhrif á þá ákvörðun að slíta sambandinu,“ segir hún.

Þá segir Sigþrúður Kvennaathvarfið hafa þurft að gera ýmsar ráðstafanir vegna COVID-19. „Konum sem koma í viðtöl hjá okkur hefur ekki fjölgað en viðtölin hjá okkur eru nú í gegnum síma og sú aðferð hugnast kannski ekki öllum. Það getur verið erfitt fyrir konur í þessari stöðu að taka slík símtöl þegar börnin eða jafnvel ofbeldismaðurinn eru heima við.“

Hún segir mikilvægt fyrir almenning að vera vakandi á þessum tímum. „Hringjum í lögreglu ef við heyrum eitthvað óeðlilegt í nágrannaíbúðum, eða í barnavernd ef okkur grunar að börn búi við ofbeldi og verum til staðar fyrir fólkið í kringum okkur.“