Ekkert ferðaveður verður á Austurlandi og verða lokanir vega víðtækar. Þetta kemur fram í tilkynningu frá lögreglunni á Austurlandi sem birtist á Facebook nú í kvöld.

Þar kemur fram að búist sé við norðanstormi á Austurlandi í nótt og í fyrramálið, með snjókomu og skafrenningi. Vind tekur svo að lægja eftir hádegi samkvæmt spám Veðurstofu Íslands en áfram þó hríð fram á kvöld.

Þá kemur enn fremur fram að aðgerðastjórnir á svæðinu hafi komið saman og að þær séu í viðbragðsstöðu. Lögregla hvetur íbúa til að fylgjast með veðurspám og tilkynningum Vegagerðar um lokanir.

Þá hvetur lögregla foreldra til að fylgjast með tilkynningum sveitarfélaga um skólahald í fyrramálið. Lögregla áréttar við íbúa og aðra sem eru á svæðinu um að vera ekki á ferðinni nema að brýnni nauðsyn.