Einn ferðamannanna sem lenti í snjóflóði í Svarfaðardal nærri Dalvík í gær er látinn. Það kemur fram í tilkynningu frá Lögreglunni á Norðurlandi eystra. Rannsókn er enn í gangi á slysinu og kemur fram í tilkynningu lögreglunnar að enn sé óljóst hvenær niðurstöður hennar liggja fyrir.
Þar segir að mennirnir þrír, sem allir eru bandarískir, séu allir fæddir árið 1988 og eru því um 34 ára gamlir. Allir hlutu þeir alvarlega áverka og var einn þeirra látinn á vettvangi. Hinir tveir voru fluttir á Sjúkrahúsið á Akureyri og annar þeirra síðan á Landspítalann. Frekari upplýsingar um afdrif hans liggja ekki fyrir hjá lögreglu á þessu stigi.
Mennirnir voru allir vanir fjallamenn og voru vel búnir.
Fram kemur í tilkynningu lögreglunnar að viðbragðsteymi Rauða krossins hafi verið kallað út og hafi farið til Dalvíkur til að huga að þeim viðbragðsaðilum sem fyrstir voru á vettvang.
Þá kemur fram að það hafi tekið lögregluna nokkurn tíma að afla upplýsinga um aðstandendur þess látna og að í nótt hafi þau notið liðsinnis starfsfólks sendiráðs Bandaríkjanna við að tilkynna aðstandendum um andlátið. Maðurinn sem lést var einhleypur og barnlaus.
Tilkynningin er hér að neðan.
