Magnús Ingvason, skólameistari Fjölbrautaskólans við Ármúla, segir að til standi að vísa 18 ára gamalli stúlku frá Pakistan úr landi á næstu dögum. Stúlkan er nemandi í skólanum og hefur verið búsett á Íslandi í fjögur og hálft ár.
Í lok nóvember fékk stúlkan bréf þess efnis að til stæði að vísa henni úr landi á þeim forsendum að hún væri orðin 18 ára gömul og þar með ekki lengur talin vera barn.
Stúlkan býr á Íslandi með foreldrum sínum og tveimur yngri systkinum en ekki hefur komið í ljós hvað verður um þau. Að öllu óbreyttu verður stúlkan aðskilin frá fjölskyldu sinni á næstu dögum.
Magnús segir málið vekja mikinn óhug og það að aðskilja fjölskyldumeðlimi sé einfaldlega skelfilegt. Bréfið var sent til stúlkunnar í lok nóvember þar sem henni er veittur fimmtán daga fyrirvari.
„Það hlýtur einhvers staðar einhver að vera með sál og það hljóta allir að sjá að þetta virkar ekki,“ segir Magnús.
Viðtalið við Magnús birtist fyrst á Fréttavaktinni í gær og er hægt að horfa á það hér að neðan.
