Einelti, hatursorðræða og kynþáttafordómar tengist allt, að sögn Sóleyjar Lóu Smáradóttur, fimmtán ára grunnskólastúlku sem stigið hefur fram og sagt frá kynþáttafordómum sem hún hefur orðið fyrir.
„Ég gæti sagt að þetta tengist allt að einhverjum vissum punkti, því að þetta er allt ljót sem er að gerast í kringum hatursorðræðu, einelti og fordóma. Ekkert við þetta er gott og þetta ætti ekki að gerast. Ég myndi segja að þetta tengist allt,“ segir Sóley Lóa, en hún og Katrín Jakobsdóttir, forsætisráðherra, voru gestir í Fréttavaktinni í kvöld.
Sóley Lóa segist oft hafa heyrt ummæli sem henni hefur fundist óþægileg. „Mér finnst að þetta ætti bara alls ekki að vera, því að það er svo leiðinlegt að fá eitthvað svona á móti sér, bara af því að maður er dökkur á hörund eða af því að maður er einhvern vegin öðruvísi,“ segir hún.
„Þetta ætti alls ekki að vera svona, engum ætti að líða illa yfir að hafa fæðst svartur eða einhvern veginn litaður eða aðeins öðruvísi, því ég ræð ekki hvernig ég fæðist, ég bara fæddist svona. Það að samfélagið tekur ekki hlýlega á móti mér, ég skil það ekki,“ segir Sóley Lóa.
Sóley Lóa gagnrýndi viðbrögð skólastjórans í grunnskólanum hennar eftir að hún tilkynnti þá fordóma sem hún hefði orðið fyrir. Skólastjóranum hafi fundist „klikkað“ að heyra þetta frá Sóleyju Lóu en vegna fárra nemenda sem eru dökkir á hörund hafði hún aldrei þurft að kljást við svona vandamál.
„Þetta var í fyrsta sinn sem hún var að fá svona mál, þannig að hún kunni örugglega ekki alveg að bregðast við svona, en hvernig hún brást við, það skildi ég ekki, því það tók hana svo langan tíma að púsla því saman hvað hún átti að gera,“ sagði Sóley Lóa.
Sóley Lóa og Katrín Jakobsdóttir voru gestir í Fréttavaktinni, sem sjá má í heild sinni hér að neðan.
