„Ég hef ekkert meira um þetta að segja, þessu símtali er lokið“

Jón Gunnarsson dómsmálaráðherra segir að lögreglan hafi verið að framfylgja skyldum sínum þegar hún handtók og flutti fimmtán manns frá Íslandi til Grikklands í nótt.

Spurður frekar út í málið sagðist hann ekki geta tjáð sig um einstök mál, og vildi til að mynda ekki ræða tímasetninguna á aðgerðum lögreglunnar, eða fullyrðingar Isavia um að lögreglan hafi fyrirskipað öryggisgæslu Keflavíkurflugvallar um að hindra fyrir blaðamönnum. Isavia hefur síðan boðist afsökunar á þætti sínum í því máli.

„Ég hef ekkert meira um þetta að segja, þessu símtali er lokið.“ sagði Jón þegar blaðamaður spurði hann frekar út í málið.

Líkt og áður segir voru fimmtán hælisleitendur fluttir frá íslandi til Grikklands klukkan fimm í nótt. Til stóð að að flytja 28 manns, en þrettán þeirra fundust ekki þegar þeirra var leitað. Gunnar Hörður Garðarsson, samskiptastjóri ríkislögreglustjóra, sagði í samtali við Fréttablaðið fyrr í dag að virk leit væri enn í gangi af þessum þrettán.

Fjöldi fólks hefur fordæmt brottflutninginn, sem og félagasamtök eins og Rauði krossinn á Ís­landi, Lands­sam­tök Þroska­hjálpar og Solaris. Þá hefur verið boðað til mótmæla klukkan 17.15, síðar í dag.

Claudia Ashanie Wil­son, lög­maður fjölskyldu sem var flutt út í nótt, segir að í Grikklandi bíði þeirra ómannúðlegar aðstæður, og óttast hún að þau endi á götunni. Þá hefur hún sérstakar áhyggjur af fötluðum manni sem var handtekinn og fluttur til Grikklands, vegna þess að hún býst ekki við því að hann muni fá heilbrigðisþjónustu í Grikklandi.