Stjórnarskrárfélagið, Efling stéttarfélag, Samtök kvenna um nýja stjórnarskrá, Gegnsæi, samtök gegn spillingu, Öryrkjabandalagið og hópur almennra borgara og félagasamtaka hefur tekið sig saman og flautað til mótmælafundar á Austurvelli á laugardag, 23. nóvember klukkan 14. Mótmælin eru undir yfirskriftinni „Lýðræði ekki auðræði—Auðlindirnar í okkar hendur!“

Skipuleggjendur hvetja almenning til að mæta og sýna samstöðu í verki.

Sjávarútvegsráðherra segi af sér

Hljómsveitin Hatari mun spila tónlist fyrir almenning og verður Katrín Oddsdóttir fundarstjóri. Ræðumenn Sólveig Anna Jónsdóttir, formaður Eflingar, Atli Þór Fanndal blaðamaður og Þórður Már Jónsson lögmaður.

Kröfur þeirra er svohljóðandi:

I. Sjávarútvegsráðherra segi tafarlaust af sér embætti.

II. Alþingi lögfesti nýja og endurskoðaða stjórnarskrá sem landsmenn sömdu sér og samþykktu í þjóðaratkvæðagreiðslu 2012—Að sjálfsögðu með því auðlindaákvæði sem kjósendur samþykktu.

III. Arður af nýtingu sameiginlegra auðlinda landsmanna renni í sjóði almennings til uppbyggingar samfélagsins og til að tryggja mannsæmandi lífskjör allra.

„Þegar svona alvarlegt mál kemur upp þá er sjálfsagt að manneskja sem hefur unnið náið með umræddum aðilum víki og stýri ekki öllum sjávarútvegsmálum á meðan,“ segir Katrín Oddsdóttir, einn skipuleggjandi mótmælanna, í samtali við Fréttablaðið.

Vinavæðing hefur einkennt sjávarútveg

„Á Íslandi viðgengst viðvarandi arðrán á auðlindum þjóðarinnar. Hagnaðurinn af sjávarauðlindinni gerir lítinn hóp ríkari með hverju árinu í staðinn fyrir að renna í okkar sameiginlegu sjóði. Þannig er farið gegn lögum sem segja að þjóðin eigi auðlindirnar. Samherjamálið sviptir hulunni af þessari staðreynd. Nú verðum við að bregðast við áður en leiktjöldin falla aftur og ná fram alvöru kerfisbreytingum. Samfélagið þarf á auðlindaarðinum að halda. Þorsteinn Már þarf ekki á meiri peningum að halda,“ segir Katrín.

Katrín segir Alþingi hafa markvisst hunsað niðurstöðu þjóðaratkvæðagreiðslu um nýja stjórnarskrá sem sé ekki bara óboðlegt heldur hreinlega ólíðandi í lýðræðisþjóðfélagi.

„Í nýju stjórnarskránni er auðlindaákvæði sem tryggir að þjóðin fái „fullt verð“ fyrir nýtingu á auðlindum sínum, eða með öðrum orðum markaðsverð. Þetta þýðir að vinavæðingin sem hefur einkennt sjávarútveginn á Íslandi undanfarna áratugi mun að öllum líkindum taka enda. Ef við horfumst í augu við spillinguna og það arðrán sem á sér stað á Íslandi á hverjum degi munum við finna kraftinn og samtakamáttinn sem þarf til þess að breyta þessu!" segir Katrín.

„Þegar svona alvarlegt mál kemur upp þá er sjálfsagt að manneskja sem hefur unnið náið með umræddum aðilum víki og stýri ekki öllum sjávarúvegsmálum á meðan.“

Mikilvægt að almenningur standi saman

Fjölbreyttur hópur samtaka og stéttarfélaga setur nafn sitt við mótmælin. Sólveig Anna Jónsdóttir, formaður Eflingar, segir skipta öllu máli að almenningur standi saman.

"Verkalýðsfélög eiga að standa með almenningi gegn ofurvaldi eignastéttarinnar. Verka og láglaunafólk hefur barist fyrir efnahagslegu réttlæti kynslóðum saman, oft með stórkostlegum árangri. Nú skiptir öllu máli að við stöndum saman og knýjum á um raunverulegar breytingar í íslensku samfélagi," segir Sólveig Anna.

Ein vinsælasta hljómsveit landsins, Hatari, mun troða upp á laugardaginn en liðsmenn sveitarinnar segja Samherja birtingarmynd síðkapítalismans.

"Græðgi Samherja er tær birtingarmynd þeirra gilda sem síðkapítalisminn elur í brjósti ungra og efnilegra mógula og svikahrappa," segir Hatari.