Daníel Annisius, for­maður stjórnar Húsa­víkur­stofu, segir gríðar­lega mikla stemmingu vera meðal bæjar­búa á Húsa­vík fyrir Óskars­verð­launa­há­tíðinni í kvöld þar sem lagið Húsa­vík er til­nefnt til verð­launa.

Daníel sat heima með konunni sinni á Húsa­vík þegar blaða­maður hafði sam­band að bíða eftir því að Óskars­verð­launa­há­tíðin væri að byrja.

„Ég tók að­eins rúnt áðan, kíkti á rauða dregilinn, fór í búð og keypti snakk og svona. Það var aga­lega mikið af fólki og spenningur í bæjar­búum. Þetta er svona eins og á Euro­vision kvöldi nema þetta er Óskars­verð­launa­há­tíðin,“ segir Daníel.

„Ef það væri ekki co­vid þá væri risa­partý hérna og allt að gerast. En mér skilst á fólki að það ætlar að vera í litlum hópum heima hér og þar.“

Mynd­band við lagið sem var tekið upp á Húsa­vík verður sýnt á há­tíðinni í kvöld og segir Daníel að stúlkna­kórinn frá Húsa­vík verður með sér­staka á­horfs­veislu í kvöld.

„Stúlkna­kórinn sem söng í at­riðinu með Molly [Sandén] ætlar að hittast og horfa saman. Þetta er auð­vitað gríðar­lega stórt tæki­færi fyrir þær og skemmti­leg upp­lifun fyrir þær að vera í þessu,“ segir Daníel.

Stúlknakórinn ætlar að hittast í kvöld og horfa á Óskarinn.
Ljósmynd/Hringbraut

„Þegar við fengum til­nefninguna þá fór allt bara á milljón“

Húsa­víku­stofa hefur nýtt sér til­nefningu og nafn lagsins til hins ítrasta og unnið hörðum höndum í að markaðs­setja Húsa­vík á er­lendri grundu.

„Þetta er búið að vera gríðar­leg vinna. Myndin kom út í fyrra og þá var auð­vitað gríðar­lega mikið um­tal um myndina og allt það. Svo dvínaði það að­eins eðli­lega og svo fór Ör­lygur Hnefill, sem er gríðar­legur frum­kvöðull og kraftur í honum, af stað með mynd­bönd og her­ferðina Óskar frá Húsa­vík. En þegar við fengum til­nefninguna þá fór allt bara á milljón,“ segir Daníel.

Hann hitti Ör­lyg fyrr í kvöld og fóru þeir yfir árangurinn. „Það eru um 400 sblaða­greinar og við­töl sem hafa farið út síðustu vikurnar. Þannig þetta er alveg gríðar­lega mikið og tug milljónir manna sem eru búnir að heyra um Húsa­vík. Ég held að menn átta sig ekki alveg á um­fanginu á því hvað þetta er stórt,“ segir Daníel.

Lyft upp andanum í bænum á covid-tímum

„Það sem er skemmti­legt við þetta núna er að á síðustu vikum hafa allir lagst á eitt og hjálpast að við að grípa þetta tæki­færi. Fyrir­tæki, ein­staklingar og sveitar­fé­lagið. Til þess að vinna úr þessu því þetta er tæki­færi sem mun ekki koma aftur, að lítill bær á Norð­austur­landi fái svona at­hygli,“ segir Daníel.

„Líka núna á co­vid-tímum þá er þetta er búið að vera gríðar­lega gaman og lyft upp andanum hérna í bænum. Ég er búinn að vera hérna að mála rauða dregilinn og það gaman að sjá at­hyglina sem hann fær.“

Daníel segir að allt þetta já­kvæða um­tal um Húsa­vík í er­lendum fjöl­miðlum hefur létt á bæjar­búum á tímum kórónu­veirunnar.

„Það er akkúrat eitt­hvað svona sem fólk þarf á þessum tímum,“ segir Daníel.

„Hvernig sem á fer þá er þetta gríðar­legur sigur fyrir Húsa­vík“

Spurður um hvort hann hafi trú á því að lagið vinni segist Daníel vona það besta.

„Hvernig sem á fer þá er þetta gríðar­legur sigur fyrir Húsa­vík og okkur öll. Auð­vitað er maður já­kvæður og vonar það besta en við gerum okkur alveg grein fyrir því að við erum ekki eina lagið, þetta er ekki alveg komið,“ segir Daníel.

„Við ætlum síðan að halda á­fram að vinna með þetta eftir­á og halda þessum bolta á lofti. Bæði til að halda okkur sem hvala­skoðunar­höfuð­borgin og Euro­vision­borgin,“ bætir Daníel við að lokum.