Druslu­göngunni, sem átti að fara fram í mið­bæ Reykja­víkur í dag, hefur verið frestað um ó­á­kveðinn tíma. Þetta kemur fram í frétta­til­kynningu frá skipu­leggjum há­tíðarinnar og á sam­fé­lags­miðlum.

Áður en tilkynningin barst hafði Fréttablaðið rætt við Ingu Hrönn Jónsdóttur, eins forsvarsmanna göngunnar og birtist viðtalið hana í Helgarblaði Fréttablaðsins í dag. Hér má lesa viðtalið óbreytt þrátt fyrir frestun göngunnar, sem varð ljós eftir að blaðið fór í prentun í gærkvöldi.

Druslugangan hefur verið árlegur viðburður frá árinu 2011, nema í fyrra þegar gangan var rafræn.
Fréttablaðið/Andri Marínó

„Fólk er orðið svolítið þyrst í að fá gönguna aftur, það var engin ganga í fyrra vegna faraldursins,“ segir Inga Hrönn Jónsdóttir, ein af forsvarsmönnum göngunnar.

Áhuginn er ekki síst vegna annarrar bylgju #MeToo, ef svo má að orði komast, sem hófst fyrr á þessu ári. „Fólk er mjög reitt vegna allrar umfjöllunarinnar sem er búin að vera. Gangan er á mjög góðum tíma miðað við umræðuna í þjóðfélaginu.“

Einblínt á jaðarsetta hópa

Búist er við að um þúsund manns taki þátt. Þemað í ár er valdaójafnvægi. „Það er í samræmi við allt sem er búið að vera í gangi í umræðunni. Við ætlum að einblína á jaðarsetta hópa í ár,“ segir Inga Hrönn. Hún segir margar birtingarmyndir af valdaójafnvægi. „Þetta getur verið fatlaður einstaklingur á móti ófötluðum einstaklingi. Þetta getur verið yfirmaður eða einhver frægur. Einstaklingur sem er hátt settur í þjóðfélaginu sem brýtur á einhverjum sem er lægra settur.“ Jaðarsettir hópar eru einnig af mörgu tagi. „Þetta eru til dæmis innflytjendur, heyrnarlausir eða fatlaðir, þetta er svo margslungið.“

Druslugöngunni hefur verið frestað vegna nýrra samkomutakmarkanna.
Fréttablaðið/Andri Marínó

Druslugangan á rætur sínar að rekja til Toronto í Kanada. „Lögreglan þar fór að tala um að konur þyrftu ekki að klæða sig eins og druslur til að verða ekki fyrir kynferðislegu ofbeldi og áreitni. Druslugangan var haldin fyrst þar árið 2011. Upphaflega var þetta þannig að konur mættu saman í „druslulegum“ fötum til að skila skömminni,“ segir Inga Hrönn. „Síðan þróaðist þetta yfir í að við tökum sérstaka málaflokka fyrir.“

Eigum langt í land

Inga Hrönn segir að Ísland sé komið mjög langt í þessari baráttu á þeim áratug sem er liðinn frá fyrstu göngunni. „Við erum komin mjög langt að mörgu leyti en það er samt líka mjög langt í land, við sjáum það bara á umræðunni síðustu vikur.“

Göngunni lýkur með samkomu á Austurvelli.
Fréttablaðið/Þórsteinn

Í kjölfar göngunnar munu forsvarsmenn Druslugöngunnar fara í herferð til að vekja athygli á úrræðum fyrir jarðarsetta hópa. „Við erum að hanna plaköt núna sem sýna hvar er hjólastólaðgengi í höfuðborginni fyrir fatlaða. Hvar er hægt að nálgast túlkaþjónustu. Ýmislegt þannig,“ segir Inga Hrönn. Þá hyggst hópurinn fara með fræðslu í skóla og félagsmiðstöðvar. „Við ætlum að fara með fyrirlestra í skóla og í félagsmiðstöðvar þar sem við bendum á úrræði fyrir jaðarsetta hópa. Til dæmis, ef þú ert í vímuefnaneyslu þá getur þú leitað á tiltekna staði. Þessir hlutir eiga það til að gleymast í umræðunni því hún á ekki við alla.“

Margir bókað í flúr

Húðflúrstofan Dragonfly Ink í Kringlunni hefur síðustu daga boðið upp á sérstakt Druslugöngu-tattoo. Stofan opnaði í maí síðastliðnum og er rekin af Sólveigu Hlynsdóttur og bróður hennar Páli Heiðari. „Ég held að við séum búin að bóka í 45 húðflúr í heildina. Við erum að rúlla um átta til tíu á dag,“ segir Sólveig. Einn skipuleggjandi göngunnar fékk sér svona húðflúr fyrir nokkrum árum, sá flúrari er nú látinn. „Við hönnuðum flúrið upp úr hennar.“

Druslugönguflúrið er um níu sentimetrar á lengdina og sex sentimetrar á breidd. Húðflúrið kostar tíu þúsund krónur sem telst ódýrt þegar kemur að húðflúrum. „Þetta er ekkert sem við erum að græða á, við erum að þessu til að skila okkar til samfélagsins.“

Slegið í gegn

Sólveig segir að flestir fái sér húðflúrið til að sýna málstaðnum samstöðu. „Árið er 2021, það er alveg í lagi að konur gangi í stuttu pilsi niður í bæ án þess að eiga von á einhverju. Það mega allir vera eins og þeir vilja án þess að eiga skilið að lenda í einhverju. Þetta er samstaða um að það er ekki í lagi að brjóta á öðrum og að það sé ekkert til að skammast sín fyrir.“

Sólveig segir að stærsti hluti þeirra sem fái sér flúrið séu konur. „Það eru um 80 prósent konur. En það eru alveg að detta karlar inn til okkar líka.“

Flúrið verður á tilboði alveg fram að göngunni. „Síðasta flúrið er bókað rétt fyrir göngu,“ segir Sólveig. Hún segir að stefnt verði á að bjóða upp á svipað tilboð að ári. „Þetta er fyrsta skiptið sem við prufum þetta og viljum sjá hvaða viðtökur þetta fengi, það gjörsamlega sló í gegn þannig að við munum halda þessu ár.“