Ríkisendurskoðun hefur sent fjármála- og efnahagsráðuneytinu, Bankasýslu ríkisins og stjórn hennar drög að Íslandsbankaskýrslunni, skýrslu ríkisendurskoðanda um söluna á hlut ríkisins í Íslandsbanka. Umsagnarferli að drögunum er þar með hafið en umsagnarfrestur er veittur til og með 19. október.
Í tilkynningu á heimasíðu Ríkisendurskoðunar er áréttað að trúnaður gildi um umsagnardrög skýrslunnar. „Um skýrsludrögin verður því ekki fjallað efnislega í umsagnarferlinu, hvorki af hálfu Ríkisendurskoðunar né umsagnaraðila.“
Í viðtali við Fréttablaðið, fyrr í vikunni, sagði Guðmundur Björgvin Helgason, ríkisendurskoðandi, að hann væri vongóður um að skýrslunni yrði skilað til Alþingis í lok næstu viku. Skýrslan verður svo gerð opinber fyrir almenning, en skilum á henni hefur ítrekað verið frestað.
Skýrslan átti fyrst um sinn að vera tilbúin í júní, henni var síðan frestað til júlí, síðan ágúst og í september sagði ríkisendurskoðandi að búast mætti við að skýrslunni yrði skilað fyrir lok september, enda væri skýrslan á lokametrum. Í lok september frestaðist hún síðan enn og aftur.
Talsvert hefur verið deilt um framkvæmd sölunnar á hlut ríkisins í Íslandsbanka. Þá hefur sætt gagnrýni að starfsfólk og hluthafar hjá fjármálastofnunum sem sáu um sölu bankans hafi sjálft fengið að kaupa hlut í bankanum.
Meðlimir stjórnarandstöðunnar vildu fá sérstaka rannsóknarnefnd á vegum Alþingis til að leggja mat á söluna en við því var ekki orðið.
