Drífa Snædal hefur ákveðið að segja af sér embætti forseta Alþýðusambands Íslands og þeim trúnaðarstöðum sem ég hef gegnt sem forseti. Drífa segir frá því í Facebook-færslu nú fyrir stuttu sem má lesa hér að neðan, hún vísar meðal annars til kjaraviðræðna og til samskipta við kjörinna fulltrúa innan sambandsins.

Drífa segir í yfirlýsingu sinni að þing ASÍ sé í október og að hún hafi þurft að gera það upp við sig hvort hún myndi halda áfram og að niðurstaðan sé sú að hún treysti sér ekki til þess. Hún segist vita að hún njóti stuðnings en að samskipti við „ýmsa kjörna fulltrúa innan sambandsins“ og blokkamyndun innan þess geri henni ókleift að starfa sem forseti.

„Ég hef ekki vílað fyrir mér að taka slaginn fyrir launafólk gagnvart stjórnvöldum eða atvinnurekendum enda er það hluti af því að vera í verkalýðsbaráttu. Átök innan ASÍ hafa hins vegar verið óbærileg og dregið úr vinnugleði og baráttuanda. Þegar við bætast ákvarðanir og áherslur einstakra stéttarfélaga sem fara þvert gegn minni sannfæringu er ljóst að mér er ekki til setunnar boðið,“ segir Drífa í yfirlýsingunni og að hún treysti sér ekki til að vinna með fólki sem hún ekki á samleið með. Hún vísar þar til hópuppsagnar á skrifstofu Eflingar og óljósri gagnrýni formanns VR, Ragnars Þórs Ingólfssonar, á hennar störf.

„Dæmin eru fleiri og það sem fólk leyfir sér í samskiptum hvert við annað innan hreyfingarinnar er henni ekki til framdráttar og félögum ekki til hagsbóta,“ segir Drífa og segir svo að hún geti ekki lengur sinnt störfum sínum innan ASÍ.

„Þá er hreinlegast að segja þetta gott. Og til að taka af allan vafa er þetta ekki hluti af einhverri stærri fléttu, ég einfaldlega hverf af þessum vettvangi án þess að hyggja á endurkomu.“

Yfirlýsingu Drífu er hægt að lesa hér að neðan.

Fréttin hefur verið uppfærð.