Dóra Björt Guð­jóns­dóttir, borgar­full­trúi Pírata, fjallaði um fjárhagsáætlun borgarstjórnar fyrir árið 2020 í ljóði á umræðufundi í dag. Dóra ákvað að brjóta upp fundinn með rammíslensku rímnaflæði. „Skilaboð geta bara batnað með hrynjanda og rími,“ sagði Dóra og bætti svo við:

„Ég vona að þið kunnið að meta smá af góðu gríni,“ áður en hún flutti ræðuna um áætlunina. Hér fyrir neðan má sjá Dóru flytja ljóðið sem hefst á tímanum 3:00:30 í myndbandinu.

Í ljóðinu leggur Dóra áherslu á framsækni með nýsköpun, uppfærslu á skjalakerfi borgarinnar, öflugri aðgerðum gegn heimilisleysi og notendavænna stjórnkerfi.

Dóra birti einnig ljóðið í heild sinni á Facebook síðu sinni í dag.

Með betri þjónustu borgin okkar verður vænni.
Tökum nokkur stökk svo að hún verði líka grænni.
Á forsendum íbúanna með róttækni að vopni.
Skiljum við fortíðina, við þurfum framsækni.

Með öflugum aðgerðum gegn heimilisleysi,
okkar kæra fólki þannig reddum eigin pleisi.
Húsnæði fyrir alla og öll höfuð undir þök,
við vinnum hörðum höndum til að stopp'í þessi göt.

Göngugötur fyrir alla, við viljum ganga og hjóla.
Leikskólar til að læra, til að gleðjast, til að róla.
Af krafti skulum efla fólksins öra og frjálsa flæði,
með menntastefnu styrkjum við svo okkar lýðræði!

Áhersla á nýsköpun og með því mögnuð svið,
faglegri vinnubrögð og við horfum fram á við.
Hendum breytingum frá 2007,
meira af því er nú í fjárhagsáætlun númer tvö.

Aukum jafnrétti, því rétturinn er okkar.
Skýrt umburðarlyndi til okkar góða fólkið lokkar.
Valdefling íbúa í íbúaráðum,
fræjum breytinga og nýjunga við stráum.

Skjalakerfi fáum við nú öflugt og nýtt,
búin að bíða ansi lengi en margt þá verður títt.
Kominn tími á að rafrænt taki völdin,
eftir hverju er að bíða, það er 21. öldin!

Notendavæn svo um munar við svo sannarlega verðum,
með þeim pælingum nú stjórnkerfið við herðum.
Snjallborgin fyrr og nú opnar huga vor og hjarta,
höldum áfram að þróa fyrir framtíðina bjarta.

Græna netið kemur með náttúruna flotta og fína,
þar að auki betri strætó og okkar kæra borgarlína.
Fetum nokkur skref í átt að meiri skilun og flokkun.
Gas-, og jarð-, og lífrænt og við loftslagsmálin rokkum.

Evrópupeningar fyrir orkuskipt'í samgöngum,
með breyttum ferðavenjum áfram keik við göngum.
Megum engan tíma missa, minnkum kolefnisins spor,
það sem núna þörfnumst við er kjarkur, styrkur, þor!

Sækjum um að verða Evrópunnar græna borg,
grænt eykur lífsins gæði um bæði göturnar og torg.
Reykjavíkin vaxi og dafni eins og og fegursta jurt,
þéttum byggð, lífgum við og svo flugvöllinn burt!