Sviðslistafólk lýsir yfir áhyggjum yfir stöðu dansara og danshöfunda innan sviðslistastofnana sem njóta stærstu fjárhæða úr sameiginlegum sjóðum landsmanna. Aðalfundur Félags íslenskra leikara og sviðslistafólk var haldinn 21. janúar síðastliðinn.

Á fundinum var Birna Hafstein einróma endurkjörin formaður félagsins til næstu þriggja ára. Aðrir stjórnarmenn eru Bergþór Pálsson, Eva Signý Berger, Hjörtur Jóhann Jónsson, Katrín Gunnarsdóttir, Halldóra Geirharðsdóttir, Ólafur Darri Ólafsson og Ólafía Hrönn Jónsdóttir.

Á fundinum voru meðal annars málefni dansara til umræðu en félagið hefur í langan tíma reynt að ná fram viðunandi samningum fyrir dansara í leikhúsum. Sterk samstaða og einróma álit er meðal fundarmanna að við þetta mætti ekki lengur una.

„Gróf mismunun á sér stað hvað varðar laun dansara sem njóta lakari kjara en samherjar þeirra á leiksviðinu. Það þarf að ganga til samninga við þennan hóp listamanna. Sviðslistastofnunum ber að virða menntun og reynslu í ráðningum fagfólks og mega ekki mismuna einstaklingum eftir starfssviði eða kyni. Það brýtur í bága við hlutverk stofnananna samkvæmt lögum, samþykktum og yfirlýstri jafnlaunastefnu þeirra,“ segir í áliti sviðslistamanna.

Stjórnarmenn félags íslenskra leikara og sviðlistafólks hvetur sviðslistastofnanir til að gera kjarasamninga við danshöfunda á jafnréttisgrundvelli við aðra listræna stjórnendur sviðsetninga.

Birna Hafstein formaður.