Dómsmálaráðuneytið hefur staðfest úrskurð kjörnefndar um að vísa frá kæru Vigdísar Hauksdóttur, borgarfulltrúa Miðflokksins, um ógildingu borgarstjórnarkosninganna, sem fram fóru í Reykjavík í fyrra. Þetta kemur fram í úrskurði ráðuneytisins sem Fréttablaðið hefur undir höndum. Vigdís segir Dag B. Eggertsson borgarstjóra sitja með illa fengin völd.

Ekki heimilt að víkja frá kærufrestinum

Vigdís kærði kosningarnar upphaflega til sýslumanns eftir að Persónuvernd gerði athugasemdir við notkun Reykjavíkurborgar á persónuupplýsingum í aðdraganda kosninganna. Vigdís segir úrskurð dómsmálaráðuneytisins vera gríðarlegt áfall fyrir lýðræðið í landinu.

Málið hefur farið fram og til baka í dómskerfinu en í byrjun júní fól dómsmálaráðuneytið Sýslumanni á höfuðborgarsvæðinu að skipa þriggja manna nefnd til að taka afstöðu til kæruefnis Vigdísar. Sú nefnd vísaði þá kærunni frá vegna þess að kærufrestur er sjö dagar frá því að úrslit kosninga eru kynnt. Vigdís kærði hins vegar kosningarnar tæpu ári síðar en hún hefur viljað meina að nýr kærufrestur hafi átt að hefjast daginn sem Persónuvernd birti úrskurð sinn um kosningarnar.

Persónuvernd komst þannig að þeirri niðurstöðu í febrúar að borgin, Þjóðskrá og tveir rannsakendur við Háskóla Íslands hafi ekki farið eftir ákvæðum þágildandi persónuverndarlaga í aðdraganda kosninganna. Brotin fólust í smáskilaboðum sem send voru á innflytjendur, konur yfir áttræðu og ungt fólk með hvatningarorðum um að mæta á kjörstað.

Aldrei að vita hvernig kosningarnar hefðu farið

Vigdís segir málinu ekki lokið. „Málinu er ekki lokið þó ég sé búin að tæma allar kæruleiðir innanlands. Þessu var vísað frá vegna þessa sjö daga ákvæðis en eftir stendur lögbrotið. Málið er í pattstöðu,“ segir Vigdís. „Það er hægt að kæra málið til héraðsdóms en ég get ekki á þessari stundu tjáð mig um hvort ég fari með málið lengra, það eru mjög mörg brýn spillingarmál í borginni sem bíða úrlausnar.“

Segir hún óeðlilegt að borgarfulltrúi sé í málarekstri fyrir dómstólum gegn borginni. „Það er kannski að einhver almennur borgari sjái sig knúinn að fara með þetta fyrir dómstóla.“

Vill hún ekki útiloka að kosningarnar hefðu farið á annan veg. „Það munaði afar fáum atkvæðum að Sjálfstæðismenn næðu inn manni á kostnað Samfylkingarinnar. Það munaði minna en 500 atkvæðum að Miðflokkurinn næði inn öðrum manni. Þáverandi meirihluti féll í síðustu kosningum, annað skiptið í röð, en þeir hafa alltaf fundið nýtt varahjól.“

Vigdís furðar sig á að ráðuneytið taki málið ekki fyrir, lítur hún svo á að kærufresturinn hafi byrjað að líða eftir úrskurð Persónuverndar í málinu, hún hafi skilað öllum gögnum og kæru innan sjö daga frá úrskurðinum. „Til hvers eru eftirlitsstofnanir er ekkert er hægt að gera þegar upplýst er um lögbrot? Það er augljóst er að þessi staðreynd kallar á lagabreytingar.“

Hún segir ábyrgðina alfarið á höndum meirihlutans og Dags B. Eggertssonar borgarstjóra. „Það var Dagur B. Eggertsson sem flutti þessa tillögu inni í borgarráði að fara í þessar aðgerðir sem Persónuvernd komst að því að væru ólöglegar. Það má alveg segja að hann sitji núna uppi með illa fengin völd,“ segir Vigdís. „Það var Reykjavíkurborg sem stjórnvald, undir stjórn Dags B. Eggertssonar, sem ákvað að snerta við hópum sem, samkvæmt skoðanakönnunum, voru líklegastir til að kjósa Samfylkinguna. Fólk af erlendu bergi brotið, ungmenni og konur yfir áttrætt.“