Hátt í 200 hundruð þúsund manns hafa lagt nafn sitt við undirskriftarlista þar sem þess er krafist að Alexis Krot, dómara í Michigan í Bandaríkjunum, verði vikið frá störfum.

Myndband af samskiptum Alexis við 72 ára karlmann, Burhan Chowdhury, hefur vakið athygli en Burhan var kærður fyrir að hafa garðinn við heimili sitt í borginni Hamtramck í órækt í talsverðan tíma. Braut hann þar með gegn samþykkt borgarinnar um viðhald á lóð sinni.

Þegar dómari, Alexis Krot í þessu tilviki, tók málið fyrir á fjarfundi með Chowdury á dögunum vandaði hún honum ekki kveðjurnar þó hann reyndi að útskýra fyrir henni að hann glímdi við mikinn heilsubrest og væri í lyfjameðferð vegna krabbameins.

„Þú ættir að skammast þín,“ sagði Alexis við Chowdhury og bætti því við að ef hún gæti dæmt hann í fangelsi myndi hún gera það. Sonur Chowdury, Shibbir Chowdhury, sem var með honum á fjarfundinum, útskýrði fyrir dómaranum að vissulega hefði garðurinn verið í órækt.

Sagðist Shibbir hafa séð um garðinn á undanförnum árum en þegar kæran barst hafi hann verið staddur erlendis vegna vinnu sinnar. Tók hann fram að búið væri að sinna viðhaldi á garðinum síðan kæran barst. Niðurstaðan var engu að síður sú að Burhan var gert að greiða hundrað dollara í sekt.

Fox 2-fréttastofan í Detroit leitaði viðbragða hjá Krot sem sagðist gjarnan vilja tjá sig um málið og þá gagnrýni sem hún hefur fengið. Yfirmaður hennar hafi þó ráðlagt henni að gera það ekki.