Diljá Ámunda­dóttir Zoëga sækist eftir þriðja sæti á lista Við­reisnar í komandi borgar­stjórnar­kosningum. Próf­kjör verður hjá flokknum um efstu fjögur sætin.

Diljá er fyrsti vara­borgar­full­trúi Við­reisnar og hefur átt sæti í ráðum og nefndum á nú­verandi kjör­tíma­bili og sinnt sínum störfum af ást­ríðu og látið hjarta ráða för.

Diljá segir í til­kynningu að hún bjóði fram fyrir börnin og að það sé mikil­vægt, þegar búin er til fram­tíðar­sýn fyrir borgina, að það sé litið til barna.

„Ég vil fjár­festa í börnum til fram­tíðar. Rann­sóknir benda á að sterk tengsl séu á milli fjölda á­falla og and­legs á­lags í æsku og skertrar getu til að takast á við á­skoranir dag­legs lífs og seiglu á full­orðins­árum,“ segir Diljá í til­kynningunni og bendir á að talið sé að 60 prósent barna upp­lifa á­föll og búa við and­legt álag á ein­hverjum tíma­punkti.

„Ég mun beita mér fyrir að stytta bið­lista, auka að­gengi barna að geð­heil­brigðis­þjónustu/sál­fræði­þjónustu sem og að flétta mennta- og vel­ferðar­kerfunum saman í ein­stak­lings­miðaðan stuðning. Hér er gríðar­lega mikil­vægt að stuðla að þéttara sam­starfi ríkis og borgar,“ segir Diljá sem einnig vill styrkja mann­lega inn­viði og ein­falda kerfið.

Til­kynninguna er hægt að lesa í heild sinni hér að neðan en fyrir hafa þau Þórdís Lóa Þórhallsdóttir, núverandi oddviti Viðreisnar, og Pawel Bartoszek, kynnt um að þau sækist eftir að halda sætum sínum í 1. og 2. sæti.

Diljá býður sig fram fyrir börnin í borginni

Diljá Ámundadóttir Zoëga hefur ákveðið að bjóða sig fram í prófkjöri Viðreisnar í Reykjavík og stefnir á 3. sætið á lista. Diljá er fyrsti varaborgarfulltrúi Viðreisnar og hefur átt sæti í ráðum og nefndum á núverandi kjörtímabili og sinnt sínum störfum af ástríðu og látið hjarta ráða för.

Helstu áherslur mínar:

Börnin eru framtíðin
Þegar sköpuð er skýr framtíðarsýn fyrir borgina þarf að byrja á því að horfa til barna í dag. Ég vil fjárfesta í börnum til framtíðar.
Rannsóknir benda á að sterk tengsl séu á milli fjölda áfalla og andlegs álags í æsku og skertrar getu til að takast á við áskoranir daglegs lífs og seiglu á fullorðinsárum.
Talið er að um að 60% barna upplifa áföll og búa við andlegt álag á einhverjum tímapunkti. Heimilisofbeldi hefur aukist um 20% í heimsfaraldri. Afleiðingar á geðheilsu barna vegna skerts skólastarfs í 2 ár munu líka koma í ljós og við verðum í nokkurn tíma að vinda ofan í því.
Ég mun beita mér fyrir að stytta biðlista, auka aðgengi barna að geðheilbrigðisþjónustu/sálfræðiþjónustu sem og að flétta mennta- og velferðarkerfunum saman í einstaklingsmiðaðan stuðning. Hér er gríðarlega mikilvægt að stuðla að þéttara samstarfi ríkis og borgar.

Mannlegir innviðir - kerfi fyrir fólk en fólk fyrir kerfi
Mannlegir innviðir Reykjavíkurborgar eru fólkið sjálft. Þetta er fjölbreytt fólk með ólíkar þarfir. Eitt eiga þau sameiginlegt og það er mannvirðing. Það er réttur allra að þjónusta og viðmót borgarinnar sé mennsk og aðgengileg en ekki stýrð af kerfislægri hugsun. Ég mun beita mér fyrir því að öll mannvirki og opin svæði Reykjavíkurborgar séu aðgengileg fyrir öll og fari eftir viðmiðum algildrar hönnunar.

Einfaldara kerfi á gervihnattaöld

Ég vil hlúa að einfaldara hversdagslífi fyrir fjölskyldur og skapa aðgengilegri farveg fyrir atvinnurekendur og frumkvöðla. Með stafrænni umbreytingu Reykjavíkurborgar opnast ótal tækifæri fyrir einfaldari, aðgengilegri og betri þjónustu fyrir alla borgarbúa. Fækkun skrefa í þjónustuferlum felur í sér tímasparnað og streituminnkun.

Almennt um Diljá:

Diljá situr í Skóla- og frístundaráði, Mannréttinda-, nýsköpunar- og lýðræðisráði, Ofbeldisvarnarnefnd, Íbúaráði Miðborgar og Hlíða og er formaður Samstarfsnefndar skíðasvæða höfuðborgarsvæðisins. Þar fyrir utan hefur hún setið í stýrihópum á kjörtímabilinu ma. Um bætt starfsumhverfi leikskóla og jafnlaunastefnu

Diljá er með BA gráðu frá KaosPilot-skólanum, MBA gráðu frá HR og diplóma á meistarastigi í sálgæslufræðum frá EHÍ.

Fyrir störf eru meðal annara uppbygging tónlistarhátíðarinnar Iceland Airwaves, CCP games, Hörpu tónlistar og ráðstefnuhús, RÚV, Borgarleikhúsið, Latibær og eigið fyrirtæki í almannatengslum Þetta reddast ehf.