Lög­maður á­tján ára drengs sem var vísað úr landi í síðustu viku segir að hann sé enn á götunni og hafi gist í al­mennings­görðum í Grikk­landi. Hann segir það hrika­legt að sjálf­stæðis­menn klappi fyrir Jóni Gunnars­syni, dóms­mála­ráð­herra á sama tíma og fólk er sent í erfiðar að­stæður í Grikk­landi. Fjöldi félagasamtaka hafa fordæmt brottflutning hans eins og Unicef á Íslandi, Barnaheill og Rauði krossinn.

„Hann er á götunni. Ég er á fullu að reyna ganga frá undir­búningi dómsmáls gegn Ís­lenska ríkinu. Það eru á­kveðnar pælingar í gangi að svo stöddu sem ég get ekki talað um. En ég geri ráð fyrir að form­lega sé málinu lokið í huga stjórn­valda. Þeir eru búnir að losa sig við hann úr landinu og það verður ekkert gert fyrr en ég kem þessu dóms­máli í gang,“ segir Davor Purusic, lög­maður drengsins.

Davor segir að með dóms­málinu sé verið að leita að viður­kenningu að mál drengsins verði tekið til efnis­legar með­ferðar á sama hátt og þegar hann kom til landsins sem fylgdar­laust barn.

„Það snýst um það, að hann fái viður­kenningu, það eru til staðar dóma­for­dæmi fyrir ís­lenskum dóm­stólum þar sem dóm­stólar hafa sagt að það eru ekki um­sækj­endur um al­þjóð­lega vernd sem eiga að gjalda fyrir það að stjórn­völd á­kveða að fara í um­fangs­miklar og tíma­frekar rann­sóknir. Sér­stak­lega í ljósi þess að Út­lendinga­stofnun kláraði ekki rann­sóknina á máli drengsins. Það bendir til þess að rann­sóknin átti aldrei að fara fram, því hún var ekki eins mikil­væg og þeir töldu á meðan þeir voru að tefja málið,“ segir Davor.

Enn á götunni

Davor ræddi við strákinn fyrir tveimur dögum, en hann hefur verið í sam­skiptum við hann og vin hans undan­farna daga. Þeir eru á götunni og gista í al­mennings­görðum að sögn Davor.

„Laga­lega séð eru Grikkir búnir að veita þeim hæli, en eftir það er ekkert meira gert. Þannig að eina sem breytist fyrir þessa ein­stak­linga er að þeir eru ekki lengur í hættu að deyja í stríðs­á­tökum, í staðinn eru þeir að deyja úr hungri eða kulda í öðru landi. Hver er munurinn fyrir þessa ein­stak­linga að vera á­fram í heima­ríkinu í hættu eða í Grikk­landi í hættu?“ segir Davor.

„Við vitum öll að þetta fólk fær enga að­stöðu eða stuðning í Grikk­landi, samt erum við til­búinn að loka augunum fyrir því og horfa á sjón­varps­fréttir um tvö þúsund sjálf­stæðis­menn sem eru að drekka vín og borða há­tíðar­mat í spari­fötunum. Það er alveg hrika­legt að horfa upp á stóran hóp manna standa á fætur og klappa fyrir ein­stak­lingum eins og Jóni Gunnars­syni, í ljósi þess sem hann er að gera. En þetta er Ís­land í dag,“ segir Davor.

Hann segir að þessu máli sé ekki lokið og hann ætli að gera allt sem hann getur fyrir drenginn.

„Þetta verður ekki látið kyrrt liggja,“ segir Davor.

Fékk að gista hjá vini vinar

Drengurinn, sem kallar sig Daniel, segir í samtali við Fréttablaðið að hann hafi fengið að gista hjá vini vinar síns í nokkra daga. Hann viti ekki hvert hann fari eftir það. Hann bíður þess að heyra hvort að mál hans verði tekið fyrir á Íslandi en er ekki vongóður um stöðuna.

Enn 39 leitað

Lögreglan flutti í síðustu viku fimmtán einstaklinga með leiguflugi til Grikklands. Samkvæmt tölfræði stoðdeildar hafa á þessu ári alls 116 farið úr landi. Lögregla fylgdi 73 þeirra og 43 fóru sjálf. Af þeim fóru 38 til Grikklands, þrettán sjálf.

Enn er stoðdeildin með á sínum verkefnalista 187 einstaklinga sem á að vísa úr landi. Þar af eru mál 98 einstaklinga í vinnslu.

Af þeim fara 25 til Grikklands en alls hafa 39 einstaklingar ekki fundist.

Mál sem eru enn skráð hjá Stoðdeild í dag eru alls 187, þar af:

„Í 89 málum skorti tilhlýðilegar ferðaheimildir, s.s. ferðaskilríki eða þá að ómöguleiki er að komast til tiltekinna lands, s.s. Íraks. Þau mál eru á bið en unnið er í því að afla ferðaskilríkja, sem og yfirstandandi viðræður við umrædd ríki að taka við því fólki,“ kemur enn fremur fram í tilkynningu frá ríkislögreglustjóra.