Guðlaugur Þór Þórðarson utanríkisráðherra segir að honum hafi orðið ljóst á fundi með utanríkisráðherra Indlands í dag þeir deila áherslum og gildum í mörgum, meðal annars á fundi Sameinuðu þjóðanna.

Guðlaugur Þór ræddi fríverslun, loftlagsmál og alþjóðamál þegar hann hitti Sushma Swaraj í Nýju Delí í dag.

Samkvæmt frétt á vef Stjórnarráðsins voru möguleikar í viðskiptum ræddir, ferðaþjónusta í tengslum við beint flug á milli landsanna og fríverslunarviðræður EFTA-ríkjanna við Indland. Aukið samstarf í orkumálum og sjávarútvegi bar einnig á góma. 

„Það var einkar gagnlegt að eiga orðastað við utanríkisráðherra Indlands um stöðu mála á alþjóðavettvangi og ljóst að við deilum áherslum og gildum í mörgu, meðal annars á vettvangi Sameinuðu þjóðanna. Áhugi indverskra stjórnvalda á málefnum norðurslóða fer jafnframt vaxandi og ljóst að Indland mun láta meira að sér kveða á alþjóðavettvangi á komandi árum. Því er mikilvægt að rækta tengslin og stofna til aukins samstarfs, sem er megintilgangur heimsóknar minnar til Indlands,“ er haft eftir Guðlaugi Þór á vefsíðunni.