Í fjörunni í Grafarvogi má sjá dauðan hval sem rekið hefur á land. Um er að ræða grindhval, stundum nefndur marsvín, og er hann illa leikinn. Hvalurinn er óvenju ljós á lit miðað við grindhvali og er ekki ósennilegt að einhverjir rugli honum saman við mjaldur.

Líffræðingurinn Gísli Víkingsson, sem starfar hjá Hafrannsóknarstofnun, segir að það myndi þó heyra til tíðinda en mjaldurinn heldur sig einkum í kringum Norðurheimskautið. Öllu algengara sé að grindhvalir reki á land við strendur Íslands en einnig við Færeyjar.

„Það er rotnunin sem hefur farið svona með hann. Hann er greinilega búinn að vera dauður lengi, hvort sem hann hefur legið þarna eða úti í sjó,“ segir Gísli í samtali við Fréttablaðið.

Grindhvalurinn er að sögn Gísla félagslynd vera sem ferðast oft í hópum sem geta talið hundruð og jafnvel þúsundir. Það gerist þó einkum í úthöfum.