Starfsmaður í frístund í Síðuskóla á Akureyri hefur greinst með COVID-19. Hafa þau börn og starfsmenn frístundar sem voru með viðkomandi á fimmtudag og föstudag verið send í úrvinnslusóttkví.

Verður frístund í Síðuskóla lokað út vikuna vegna þessa, er fram kemur í tilkynningu frá Akureyrarbæ. Þar segir að starfsmaðurinn hafi fengið einkenni um liðna helgi og að smitið hafi verið staðfest í gær.

Enn er óupplýst hver uppruni smitsins er en smitrakning er hafin.

Er starfsfólk, nemendur og foreldrar þeirra beðnir að fylgjast vel með því hvort fram komi einkenni sjúkdómsins og bent á að hafa samband við heilsugæsluna ef grunur vaknar um smit.