Alldjúp lægð nálgast nú landið úr suðri. Henni fylgir stíf austan- og norðaustanátt, 15 til 23 metrar á sekúndu víða um land, en hvassviðri eða stormur við suðausturströndina fram eftir degi.

Það rignir um allt land og er búist við úrhelli á Austfjörðum og Suðausturlandi. Rigning með köflum í kvöld, en úrkomulítið Norðanlands.

Þá eru þrjár veðurviðvaranir í gildi. Appelsínugul stormviðvörun er í gildi á Suðausturlandi og stendur til hádegis. Þar er varað við snörpum vindhviðum við fjöll, staðbundið yfir 35 metra á sekúndu, t.d. undir Öræfajökli og við Reynisfjall. Þetta getur skapað hættuleg akstursskilyrði, einkum fyrir ökutæki með aftanívagna.

Varað er við hvassviðri á Suðurlandi til klukkan 18 í kvöld. Hvassast verður undir Eyjafjöllum og Mýrdalsjökli, þar verður vindhraði um 15 til 20 metrar á sekúndu og geta vindhviður náð 30 metrum á sekúndu. Þar geta jafnframt skapast hættuleg veðurskilyrði fyrir fólk á ferðinni.

Á morgun verður hægari vindur og lítilsháttar væta, en töluverðu rigning suðaustantil á landinu. Hiti yfirleitt 10 til 17 stig, hlýjast norðan- og vestanlands.

Veðurhorfur á landinu næstu daga

Á sunnudag:
Norðan og norðvestan 5-13 metrar á sekúndu á vestanverðu landinu, en annars SA-lægari og rigning eða skúrir um land allt. Hiti 8 til 16 stig, svalast á Vestfjörðum.

Á mánudag:
Norðaustan 8-13 metrar á sekúndu og dálítil rigning norðvestan til, en annars hæg breytileg átt og skúrir. Hiti 8 til 15 stig, mildast sunnan heiða.

Á þriðjudag og miðvikudag:
Austlæg eða breytileg átt og dálítil rigning eða skúrir, einkum vestan til. Hiti 7 til 14 stig.

Á fimmtudag:
Útlit fyrir vaxandi suðaustanátt og fer að rigna undir kvöld, en þurrt að mestu fyrir norðan og hlýnar í veðri.

Þrjár veðurviðvaranir í gildi.
Fréttablaðið/Skjáskot