Búast má við deilum um stuðning við fjölmiðla, þungunarrof, fiskeldi, kjaramál, þriðja orkupakkann, veggjöld og málefni dómstóla á vorþingi sem hefst um miðjan mánuð.

Fréttablaðið ræddi við formenn fastanefnda um störfin og búa þeir sig undir fjörugan seinni hálfleik 149. löggjafarþings.

Allsherjar- og menntamálanefnd

● Frumvarp um stuðning við einkarekna fjölmiðla

● Breyting á lögum um útlendinga – vegna umsókna til Alþingis um ríkisborgararétt

„Ég geri ráð fyrir því að þetta verði töluvert átakamál, bæði á milli flokka og innan flokka. Þótt flestir séu sammála um að það verði að huga að þessum málum ef menn ætla ekki að sitja bara uppi með einn ríkisfjölmiðil í landinu, eins og þróunin hefur verið, þá er ég jafn viss um að tekist verði á um aðferðirnar við að ná því markmiði.“

Páll Magnússon, formaður nefndarinnar, um væntanlegt frumvarp menntamálaráðherra um stuðning við einkarekna fjölmiðla.

Efnahags- og viðskiptanefnd

● Frumvarp um þjóðarsjóð

● Frumvarp um launafyrirkomulag þeirra sem heyrðu áður undir kjararáð

● Niðurstöður starfshóps um nýja peningastefnu 

● Hvítbók um framtíðarskipulag fjármálaeftirlitsins

● Frumvarp um breytingu á lögum um Seðlabanka Íslands

„Ég á líka von á frumvarpi, hvort heldur er á vorþingi eða á haustþingi, um breytingar á lögum
um Seðlabanka íslands. Forsætisráðherra hefur meðal annars boðað sameiningu Seðlabankans og fjármálaráðuneytisins.“ 

Óli Björn Kárason formaður. 

Atvinnuveganefnd

● Lög um fiskeldi – Væntanlegt þegar þing kemur saman

● Vandi sauðfjárbænda

● Endurskoðun búvörusamninga

● Innflutningur á hráu kjöti

● Strandveiðar

„Fiskeldisfrumvarpið hefur tekið breytingum, en ég á von á því að einhverjar deilur verði um málið, þetta er stórt og mikið mál en ég tel það sé búið að reyna að mæta mörgum sjónarmiðum þótt það verði erfitt að gera alla sátta.“

Lilja Rafney Magnúsdóttir formaður.

Fjárlaganefnd

● Endurskoðun á ríkisfjármálaáætlun

● Ríkisreikningur

● Eftirlit með framkvæmd fjárlaga

● Málefni Íslandspósts

„Lög um opinber fjármál hafa meiri samfellu í störfum fjárlaganefndar allt árið um kring og eftirlitshlutverk nefndarinnar er orðið mun skýrara. Svo eru það málefni Íslandspósts sem við erum enn með í skoðun en fyrirferðarmest á ég von á að verði þingsályktunartillaga um ríkisfjármálaáætlun.“

Willum Þór Þórsson formaður

Utanríkismálanefnd

● Stefna um alþjóðlega þróunarsamvinnu

● Þriðji orkupakkinn

„Það er lagt upp með að þetta komi til þingsins á vorþingi. Breyting á orkulögum fer til atvinnuveganefndar en aflétting stjórnskipulega fyrirvarans til okkar í utanríkismálanefnd.“

Áslaug Arna Sigurbjörnsdóttir, formaður nefndarinnar, um þinglega meðferð þriðja orkupakkans.

Umhverfis- og samgöngunefnd 

● Samgönguáætlun með tilheyrandi hugmyndum um veggjöld

● Frumvarp til nýrra umferðarlaga

● Frumvarp umhverfisráðherra um skógrækt

„Það er stefnt að því að ljúka afgreiðslu samgönguáætlunar fyrir lok mánaðarins. Veggjöldin eru
auðvitað það sem verið er að fjalla um þar og útfærslan á þeim en svo þyrfti að koma nýtt frumvarp samgönguráðherra um þau í febrúar eða mars sem myndi þá grundvallast á niðurstöðu um samgönguáætlunina.“

Jón Gunnarsson, starfandi formaður.

Stjórnskipunar- og eftirlitsnefnd 

● Skýrslur Ríkisendurskoðunar um Útlendingastofnun og um Fiskistofu

● Plastbarkamálið

● Stjórnsýsla dómstólanna

● Landsdómsmálið

● Sendiherrastöður

● Dómur Mannréttindadómstóls Evrópu um skipun í Landsrétt

„Dóms er að vænta frá Mannréttindadómstól Evrópu um skipun dómara í Landsrétt og það er ekki ólíklegt að það þurfi eitthvað að ræða hann. Svo eigum við eftirað ná fundi með fjármálaráðherra og utanríkisráðherra og þingmönnunum Gunnari Braga Sveinssyni og Sigmundi Davíð Gunnlaugssyni vegna umæla sem féllu á Klaustri. Það er inni á okkar borði og það er okkar skylda að fjalla um þann þátt, annars værum við ekki að sinna lögbundinni skyldu stjórnskipunar og eftirlitsnefndar.“

Helga Vala Helgadóttir formaður.

Velferðarnefnd

● Heilbrigðisstefna heilbrigðisráðherra

● Frumvarp um þungunarrof

● Frumvarp um starfsgetumat

● Húsnæðismál með hliðsjón af kjaraviðræðum

„Það varð mikil umræða um þungunarrofið þegar það var lagt fram og gæti orðið umdeilt þvert á flokka og jafnvel inni í flokkum, aðallega út af þessum vikufjölda.“

Halldóra Mogensen formaður