BSRB telur að bæta þurfu verulega í útgjöld ríkisins til almannaþjónustu. Fjárlagafrumvarpið var kynnt var í morgun, þar var boðuð 16 milljarða króna útgjaldaaukning til heilbrigðismála og sérstakt 2,6 milljarða króna framlag til Landspítala. Fram kemur í tilkynningu frá BSRB að þessi útgjöld muni að stærstum hluta mæta Covid-faraldrinum og byggingu nýs Landspítala en ekki til að styrkja heilbrigðiskerfið í heild sinni.

Boði stöðnun í almannaþjónustu

Telja samtökin að fjárlagafrumvarpið boði stöðnun þegar kemur að almannaþjónustu sem hafi verið undir miklu álagi í heimsfaraldrinum og í mörgum tilvikum löngu áður en hann skall á. „Boðuð aukning til málaflokksins er óveruleg og ekki verður slakað á aðhaldskröfum til mikilvægra stofnana. Ákalli eftir auknu fé í heilbrigðisþjónustuna, þar sem mönnunarvandinn er víða gríðarlega alvarlegur, er ekki svarað,“ segir í tilkynningunni.

„Eftir vanfjármögnun sem má rekja aftur um áratug er kominn tími til að blása til sóknar og grípa til aðgerða sem fela í sér raunverulega lífskjarasókn. Það er gert með því að styrkja almannaþjónustuna til að standa undir sterkri velferð og tryggja að ekki verði gengið enn frekar á andlega og líkamlega heilsu starfsfólksins sem veitir þjónustuna.“

Síður til að hjálpa fólki sem fast er í fátæktargildru

Þá segir að eignaójöfnuður sé að aukast. Aukning ráðstöfunartekna tekjulægstu hópanna sem boðuð sé í fjárlagafrumvarpinu vera til bóta en eins prósents hækkun á örorkulífeyri umfram verðlag muni ekki hafa mikil áhrif á lífskjör öryrkja og því síður hjálpa þeim sem fastir eru í fátæktargildru að komast út úr vandanum.

„Hækkun skerðingarmarka barnabóta er jákvæð en hins vegar bíður enn það verkefni að ráðast í heildarendurskoðun á barnabótakerfinu þar sem aðeins tekjulægstu foreldrarnir fá barnabætur hér á landi í núverandi kerfi á meðan foreldrar á flestum öðrum Norðurlöndum fá allir sömu bætur óháð efnahag,“ segir í tilkynningunni.

„Erfiðleikarnir eru mestir hjá öryrkjum, atvinnulausum, innflytjendum og einstæðum foreldrum. Auka verður framlög til almenna íbúðakerfisins, hækka greiðslur almanna- og atvinnuleysistrygginga til að draga úr tekjuójöfnuði, og draga verður stórlega úr tekjutengingum barnabótakerfisins þannig að bæturnar skerðist aðeins í allra hæstu tekjutíundunum.“