Hundaeigendur í Kópavogi vilja fá á hreint hvort bálfaraofnar á dýraspítölum séu blekking til að hafa fé af viðskiptavinum. Úrskurðarnefnd umhverfis- og auðlindamála tók fyrir kæru þeirra vegna opinbers eftirlits með bálförum gæludýra. Annar eigendanna sem Fréttablaðið náði sambandi við vildi ekki tjá sig um málið.

„Kærandi bendir á að tilgangur kærunnar sé að fá úr því skorið hvort dýraspítalar á höfuðborgarsvæðinu hafi gilt starfsleyfi til reksturs bálfaraofna fyrir gæludýr eða hvort bálfaraofnar á þeirra vegum séu skraut til að blekkja gæludýraeigendur til að borga okurverð fyrir þjónustu sem sé ekki framkvæmd af þeim sjálfum heldur sorpbrennslustöðvum annars staðar,“ segir í umfjöllun úrskurðarnefndarinnar. „Loks er Dýraspítalinn í Víðidal kærður fyrir ætlaða sviksemi í þjónustu sinni við gæludýraeigendur.“

Fram kemur að farið hafi verið með hund kærandans í aflífun til Dýraspítalans í Víðidal 27. desem­ber síðastliðinn. Borgað hafi verið fyrir sérbrennslu og þar til gert box fyrir ösku. Hundaeigandinn hafi þremur dögum síðar spurst fyrir um það hjá Heilbrigðiseftirliti Reykja­víkur hvort dýraspítalinn hefði starfsleyfi til bálfara eða fyrir bálstofu gæludýra og fengið þau svör að spítalinn hefði gilt starfsleyfi.

Þann 2. janúar bað hundaeigandinn heilbrigðiseftirlitið að kanna hvort brennsluofninn á dýraspítalanum hefði verið notaður á bilinu 28. desember 2019 til 6. janúar 2020. „Vísaði kærandi til þess að hann hefði borgað 50 þúsund krónur fyrir förgun á hundinum sínum, en samkvæmt upplýsingum frá sorpeyðingarstöðinni Kölku í Reykjanesbæ brenni þeir gæludýr fyrir Dýraspítalann í Víðidal fyrir um það bil tvö þúsund krónur.“

Þá segir að heilbrigðiseftirlitið hafi yfirfarið skráningar. „Og komi þar fram að hundur kæranda hafi verið brenndur með sérbrennslu á Dýraspítalanum í Víðidal 28. desember 2019,“ segir nefndin, Engin kæranleg ákvörðun liggi fyrir í málinu sem þar með sé vísað frá.

Ólöf Loftsdóttir, dýralæknir og einn eigenda dýraspítalans, hafnar ásökunum algerlega. Sérstakt sé að hundaeigendurnir hafi aldrei rætt við nokkurn hjá Dýraspítalanum í Víðidal eftir að hafa tekið við öskunni af hundi sínum.

Ólöf Loftsdóttir, dýralæknir og einn eigenda Dýraspítalans í Víðidal.
Fréttablaðið/GVA

„Við höldum auðvitað nákvæmt bókhald yfir hvað fer í ofninn og þannig gátum við sýnt fram á hvernig okkar vinnubrögð eru,“ útskýrir Ólöf. Fráleitt sé að halda því fram að dýraspítalinn sendi gæludýr til eyðingar í Reykjanesbæ eða á nokkurn slíka stað. „Ég skil ekki hvað þeim gengur til, við höfum aldrei notað Kolku.“

Að sögn Ólafar er mikill metnaður lagður í vönduð vinnubrögð hjá dýraspítalanum enda málið viðkvæmt. „Þess vegna tekur maður nærri sér þegar fólk er með svona fullyrðingar,“ segir hún og harmar að verið sé að ófrægja spítalann. „Það getur fólk úti í bæ ásakað okkur og við höfum aldrei fengið tök á að verja okkur. Það er algert rugl. Þetta eru afskaplega alvarlegar ásakanir því okkar heiður er að veði.“