Kamilla starfaði lengi í tónlistarbransanum hér á landi og var meðal annars kynningarstjóri Iceland Airwaves-hátíðarinnar og verkefnastjóri hjá Útflutningsskrifstofu íslenskrar tónlistar.

„Það var áður en ég breytti algjörlega um stefnu með það að leiðarljósi að eiga rólegra líf. Ég hafði stundað jóga og hugleiðslu í mörg ár samhliða vinnu, en það var bara ekki nóg fyrir mig þannig að ég fór bara alla leið inn á þessa línu,“ segir Kamilla sem lauk jógakennaranámi fyrir nokkrum árum síðan, en hefur síðan bætt við sig ýmiss konar heilun, síðast tónheilun og tónþerapíu í Bandaríkjunum.

„Ég þreytist ekki á að læra og er mjög forvitin manneskja að eðlisfari, hef alltaf þörf til að skoða hlutina nánar. Tónlist hefur svo alltaf verið mitt meðal, alveg frá því að ég var barn, og nú nota ég tóna og hljóð til að skapa endurnærandi upplifun fyrir fólk sem vill kærkomna hvíld frá hversdeginum, stressinu og hraðanum.“


Við erum gangandi vatnspokar

Kamilla segir tónheilun geta verið margs konar, en í grunninn séu tónar, hljóð og tónlist notuð til að bæta líkamlega og andlega heilsu og vellíðan.

„Við þekkjum það líklega öll að tónlist getur haft mikil tilfinningaleg áhrif á okkur, fengið okkur til að gráta eða vilja dansa. Hún er einfaldlega það kraftmikil og tónheilun er ekki ný af nálinni, en bæði Grikkir og Egyptar til forna notuðu tónheilun sérstaklega til að kanna andlegar víddir og komast nær sjálfinu. Jógar og ýmsir andlegir iðkendur hafa svo ómað og kyrjað um aldir alda, til að róa og hreinsa hugann.

Hljóð eða tíðni hafa áhrif á efni, sér í lagi vatn. Við erum í raun bara gangandi vatnspokar, enda um 70 prósent vatn og því getur hljóð haft mikil áhrif á okkur. Fólk finnur virkilega fyrir hljóðunum sem notuð eru í hljóðbaði um allan líkamann. Rannsóknir sýna til dæmis fram á að tónlist og tónheilun geta styrkt ónæmiskerfið, dregið úr streitu og bætt svefn.“

En hvað er hljóðbað?


„Í hljóðbaði skapa ég hljóðheim með aðstoð kristalsskála, gongs og fleiri hljóðgjafa til að hjálpa fólki að slaka á, njóta hvíldar og tengja sig inn á við. Svo nota ég hreint kakó frá Gvatemala, öndunaræfingar og ýmislegt, til að gera fólki kleift að gefa eftir inn í slökunina. Hver og einn liggur á sinni dýnu, undir teppi og hefur tækifæri til að núllstilla sig og finna fyrir friðsæld. Hljóðböð eru mjög róandi. Alla vega þau sem ég geri,“ segir Kamilla í léttum tón.


Kakó er flóknasta baun jarðar


Kakódrykkja hefur verið vinsæl í tengslum við ýmiss konar slökun og áhrif þess dásömuð, og er þá um að ræða hreint kakó, en eins og fyrr segir notar Kamilla kakó frá Gvatemala.

„Um er að ræða hreinan kakómassa sem er eins lítið unninn og mögulegt er, til að viðhalda næringarefnum og virkum efnum. Kakóbaunin er einhver flóknasta baun sem vex á jörðinni, er blóðflæðisaukandi, hefur jákvæð áhrif á úthald og orku, minnkar bólgur, ýtir undir framleiðslu á gleðiboðefninu serótónín, lækkar streituhormónið kortisól og örvar vellíðunarstöðvar í heilanum og framleiðslu á endorfíni.

Að auki inniheldur það króm, theobromine, mangan, sink, kopar, járn, C-vítamín, omega-6 fitusýrur og trýptófan, svo eitthvað sé nefnt af þeim fjölmörgu efnum sem kakóið inniheldur,“ segir Kamilla og heldur áfram;

„Í menningu Maya-fólksins í Mið-Ameríku hefur kakó og kakóplantan gegnt veigamiklu hlutverki í árþúsundir og hlotið nafnbótina fæða guðanna. Það má rekja kakódrykkju 4.200 ár aftur í tímann og því tími til kominn að þessi dásemdardrykkur rati til Íslands.“


Dásamleg viðbót


Kamilla er sannfærð um áhrifamátt kakósins og er viss um að það hjálpi til við slökun líkamans.

„Það er stútfullt af magnesíum og það er bara þannig að áður en hugurinn getur farið að slaka á, verður líkaminn að geta slakað á. Kakóið er til dæmis dásamleg viðbót við hugleiðslu þar sem það inniheldur efni sem hjálpa manni að skerpa fókus, sem er heldur betur gott þegar við reynum að stilla hugann.“

Nú á sunnudaginn stendur Kamilla fyrir viðburði í Ljósheimum sem hún kallar KakóRó og segir hún viðburðinn vera fyrir alla þá sem vilja fá smá ró í líf sitt og prófa eitthvað nýtt.

„Þetta er bæði fyrir byrjendur og þá sem iðka hugleiðslu, jóga eða hvers konar sjálfsvinnu. Ég held reglulega viðburði fyrir fólk til að njóta hvíldar og hlúa að sér.“

Kamilla hefur staðið fyrir slíkum viðburðum undanfarin fjögur ár og segir þá breytast eftir því sem hún sjálf læri meira. „Kakóið hefur þó alltaf verið rauður þráður í því sem ég geri. Svo er ég líka með hlaðvarp með vinkonu minni sem heitir Leiðin að sjálfinu og þar ræðum við alls kyns andleg viðfangsefni eins og heilun og kakó. Það má finna á Spotify og Apple Podcasts.“

Eins og fyrr segir fer KakóRó fram í Ljósheimum, sem er andleg miðstöð í Borgartúni 3. „Þar er hægt að iðka jóga, fara í hljóðbað, kaupa kristalla, fara í heilun og nudd. Ljósheimar eru sannkölluð vin í Borgartúninu,“ segir Kamilla að lokum.

Allar upplýsingar um viðburði Kamillu má finna á kako.is og frekari upplýsingar um starfsemi í Ljósheimum má finna á ljosheimar.is.