Afkomendur Steinólfs Lárussonar, rithöfundar, hafa gefið út yfirlýsingu vegna ásakana Finnboga Hermannssonar gegn Bergsveini Birgissyni, rithöfundi, um ritstuld.

Þau; Sesselja, Halla Sigríður og Stefán Skafti Steinólfsbörn segjast hafa orðið hvumsi við ásakanir Finnboga í garð Bergsveins.

Í yfirlýsingunni krefjast þau að ásakanirnar verði dregnar til baka.

Fékk orðin beint frá Steinólfi sjálfum

Finnbogi sakaði Bergsvein um að hafa að tekið texta úr bók sinni, Einræður Steinólfs, frá árinu 2003 og notað í bók sína, Svar við bréfi Helgu, frá árinu 2010.

Bergsveinn svaraði fyrir sig í færslu á Facebook-síðu sinni um helgina þar sem hann hafnaði ásökunum. Þá sagði hann jafnframt bók Finnboga um Steinólf hafa verið unna í óþökk afkomenda hans og án þeirra samþykkis.

Að sögn Bergsveins hafi hann haft orð sín, „beint úr frásagnargleði Steinólfs frænda míns sjálfs,“ og kveðst Bergsveinn lánsamur að hafa fengið að vera húsgangur á bæ Steinólfs í æsku.

„Sú saga, með þessu orðalagi, var mér sögð löngu áður en Finnbogi heyrði hana,“ segir Bergsveinn.

Bergsveinn segi sannleikann

Steinólfsbörn taka undir frásögn Bergsveins. Hér má lesa yfirlýsingu þeirra í heild sinni:

Við Steinólfsbörn urðum hvumsa við að Finnbogi Hermannsson ásaki Bergsvein Birgisson um ritstuld.

Eins og öllum hlutaðeigandi aðilum er kunnugt, færði Steinólfur sjálfur mikið af frásögnum bókarinnar Einræður Steinólfs í Ytri-Fagradal (2003) í letur. Í því tilviki, þegar Finnbogi Hermannsson ásakar aðra um ritstuld þar sem vísað er í orðfæri Steinólfs sjálfs, hefur Finnbogi eignað sér það orðfæri sem Steinólfur lagði til verksins, og í öðru lagi slær Finnbogi eign sinni á orðfæri Steinólfs almennt þegar hann sagði frá. Er rétt að geta þess að fleiri en Finnbogi Hermannsson komu að útgáfu bókarinnar, og lögðu enn ríkari ritstjórn af hendi til verksins en Finnbogi.

Við erum því hjartanlega ósammála að hann slái eign sinni á texta og orðfæri Steinólfs á þennan hátt. Förum við fram á að ásakanir þessar verði dregnar til baka.

Ekki var heldur staðið að endurútgáfu bókarinnar, Einræður Steinólfs í Ytri-Fagradal árið 2019, á þann hátt sem við vildum, og ekki veittum við heldur skriflegt umboð til þess. Þar hefur Finnbogi skeytt sínum eigin texta, sem hann kallar Skarðsstrandarrollu, framan við texta Steinólfs, og lítum við svo á að það eigi ekki heima við hlið höfundarverks Steinólfs. Og þótt höfundarréttur segi til um að bókin sé Steinólfs líka, vorum við ekki spurð álits á þessu fyrirkomulagi og erum því mótfallin.

Sesselja, Halla Sigríður og Stefán Skafti