Dagur B. Eggertsson borgarstjóri og Baltasar Kormákur Baltasarsson leikstjóri munu í dag skrifa undir samning um kaup RVK Studios á annarri skemmu Áburðarverksmiðjunnar í Gufunesi sem staðið hefur ónýtt um langt skeið. Kaupverð er 320 milljónir króna.

Fyrri skemmu Áburðarverksmiðjunnar í Gufunesi hafði áður verið ráðstafað undir kvikmyndagerð og viðburði, nú síðast undankeppni Eurovision.

Í gögnum borgarinnar um málið segir að núverandi kvikmyndaver þyki henta stærri framleiðslu vel en fyrirsjáanleg þörf sé á minna kvikmyndaveri fyrir minni tökuverkefni og einnig fyrir fleiri en eina samtímatöku. RVK Studios sér slík afnot fyrir sér með kaupunum sem kynnt verða á blaðamannafundi í dag.

Annað félag vildi kaupa skemmuna, kvikmyndafyrirtækið True North, á sama verði. Hugmyndir RVK Studios hlutu hærri einkunn hjá borginni þegar mat var lagt á umsóknirnar tvær.

Frettablaðið / Sigtryggur Ari

Dagur B. Eggertsson borgarstjóri fagnar viðskiptunum og segir mikil tækifæri í uppsiglingu á þessu svæði.

„Ég hef áður komið í þetta magnaða kvikmyndaver þegar kvikmyndir og Ófærð hafa verið í tökum og með tvöföldun á aðstöðu RVK Studios er draumurinn um alþjóðlega samkeppnishæft kvikmyndaþorp einfaldlega að verða að veruleika. Gufunesið getur þá tekið við enn þá fleiri og stærri verkefnum,“ segir Dagur.

Reykjavík muni halda áfram að blómstra sem borg kvikmyndagerðar og skapandi greina.

„Þetta skapar spennandi störf og tækifæri fyrir gríðarlega marga,“ segir borgarstjórinn um möguleikana sem eru til staðar.

Tölvuteikning sem sýnir kvikmyndaver í Gufunesi
Fréttablaðið/aðsend mynd
Frettablaðið / Sigtryggur Ari