Bónus hefur kolefnisjafnað rekstur verslana sinna fyrir árið 2018 en fyrirtækið hefur samvið við Kolvið um kolefnisbindingu. Þetta kemur fram í tilkynningu frá verslanakeðjunni. Þar segir að samningur þessa efnis hafi verið undirritaður við Kolvið í dag.

Í tilkynningunni segir að í upphafi þessa árs hafi hafist mikil vinna við að safna saman gögnum um kolefnisspor verslana Bónus um allt land árið 2018. Þeirri reikningsvinnu sé nú lokið með hjálp hugbúnaðarfyrirtækisins Klappir Grænar Lausnir hf. „Umhverfisstjórnunarhugbúnaður þeirra hefur nú verið innleiddur inn í verklag Bónus sem mun vafalaust hjálpa fyrirtækinu að ná enn betri árangri í umhverfismálum.“

Fram kemur að kolefnisfótsporið hafi verið 667 tonn af koltvísýringi árið 2018. Því muni Kolviður planta 6.670 trjám um um það bil tveggja hektara svæði til að jafna út kolefnisfótsporið. „Umhverfisvernd er eitt af stærstu verkefnum samtímans, og með þessu vill Bónus leggja sitt af mörkum og sýna um leið samfélagslega ábyrgð í verki. Bónus er fyrsta matvöruverslun á Íslandi til að kolefnisjafna sinn rekstur,“ segir í tilkynningunni.