Grunur um fimmta mislingasmitið á Íslandi hefur orðið til þess að ákveðið hefur verið að grípa til „ýtrustu varúðarráðstafana og bjóða upp á bólusetningu gegn mislingum á Austurlandi og á höfuðborgarsvæðinu.“ Sóttvarnalæknir hefur upplýst umdæmis- og svæðislækna sóttvarna um allt land um stöðuna og eru þeir í viðbragðsstöðu að hefja bólusetningarátak ef upp koma mislingar í öðrum landshlutum.

Fram kemur í tilkynningu frá embætti landlæknisað  í gærkvöldi hafi grunur vaknað um fimmta smitið og sýni frá viðkomandi aðilahafi verið sent til rannsóknar. Niðurstaða er að vænta seinni partinn í dag. Fram kemur að hinn sýkti hafi komist í snertingu við aðilann sem kom með flugi til Egilsstaða þann 15. Febrúar og greindist síðan með mislinga.

Á fundi sóttvarnalæknis í morgun með Heilbrigðisstofnun Austurlands (HSA), Heilsugæslu höfuðborgarsvæðisins (HH) og Landspítala (LSH) var því tekin ákvörðun um að hvetja eftirtalda forgangshópa á Austurlandi og á höfuðborgarsvæðinu til að þiggja bólusetningu við mislingum. 

Forgangshópar eru:

Allir sem eru óbólusettir og fæddir á bilinu 1. janúar 1970 – 1. september 2018 (6 mánaða – 49 ára).

Þeir einstaklingar sem útsettir hafa verið fyrir mislingasmiti ásamt þeirra nánasta umgangshópi.

Þessir hópar eru hvattir til að mæta í bólusetningu sem fyrst. Það er frá og með deginum í dag. Boðið verður upp á opnar bólusetningar strax um helgina á Austurlandi og á höfuðborgarsvæðinu fyrir þessa hópa og eru staðsetningar auglýstar á heimasíðum Heilbrigðisstofnunar Austurlands og Heilsugæslu höfuðborgarsvæðisins.

Þeir einstaklingar sem hafa verið bólusettir eða hafa fengið mislinga þurfa ekki frekari bólusetningu. 

Almenningi bent á að skoða bólusetningarskírteini

Fram kemur í tilkynningunni að einstaklingar sem fæddir eru fyrir 1970 hafi flestir fengið mislinga og séu því ekki í forgangi. Þeir sem hafa fengið eina bólusetningu eru heldur ekki í forgangi, en hægt verður að bjóða þeim bólusetningu síðar. Börn yngri en sex mánaða hafa ekki gagn af bólusetningu og eru þau því heldur ekki í forgangi.

Almenningi er bent á að skoða bólusetningaskírteini sín varðandi skráðar bólusetningar. Hafi þau ekki skírteinin hjá sér er hægt að hafa samband við netspjall heilsugæslunnar hér.

Nánari upplýsingar er að finna á vef landlæknis og heilsugæslunnar. Áfram eru veittar upplýsingar um mislinga í síma 1700.