Innlent

Börnin kvíðin og kasta upp í skóla­akstri

Aðstæður við Vatnsnesveg á þjóðvegi 711 eru orðnar svo slæmar að börn kvíða því að fara í skólann og kasta jafnvel upp í skólaakstri. Um 500 bílar aka um malarveginn á hverjum degi. Íbúar skora á stjórnvöld að bregðast við.

Ástand vegarins er á köflum mjög slæmt Mynd/Guðrún Ósk Steinbjörnsdóttir

Aðstæður við Vatnsnesveg á þjóðvegi 711 eru orðnar svo slæmar að börn í skólaakstri kvíða því að fara í skólann og kasta jafnvel upp á leiðinni til og frá skólanum. 

Um 500 bílar aka um malarveginn á hverjum degi. Íbúar við Vatnsnesveg á þjóðvegi 711 kalla eftir úrbótum á veginum og eru orðin langþreytt á seinagangi og skilningsleysi stjórnvalda. 

Í ályktun íbúafundar segir að börnin séu orðin kvíðin ferðunum og séu lengi að jafna sig í skólanum og þegar heim er komið við lok ferðar. Þá hafi ferðatími barnanna lengst í samræmi við ástand vegarins. 

„Þetta eru langar vegalengdir. Börnin sem eru að fara lengst eru að fara hátt í 80 kílómetra á hverjum degi. Þetta eru 11 börn sem þurfa að fara þessa vegalengd á hverjum degi auk þriggja leikskólabarna,“ segir Guðrún Ósk Steinbjörnsdóttir íbúi í samtali við Fréttablaðið í dag.

Guðrún segir að áætlað hafi verið að börnin ættu að komast leiðar sinnar á 40 mínútum en vegna ástands vegarins sé ferðatíminn hátt í klukkustund aðra leiðina.

„Foreldrar tala hreinlega um að börnin séu ekki við eftir að þau koma heim. Þeim líður illa og vilja ekki fara í skólann í rauninni,“ segir Guðrún Ósk.

Íbúar segja í ályktun sinni að þetta sé algerlega óviðunandi og að málið jaðri við að vera orðið barnaverndarmál. Fyrst var greint frá á vef Trölla.is.

Hámarkshraði lækkaður en engar framkvæmdir

Hámarkshraði á veginum hefur verið lækkaður í 30 kílómetra á klukkustund án þess að nokkrar framkvæmdir hafi átt sér stað. Mörg slys hafa orðið á veginum. Þar með talið banaslys árið 2004 þegar ferðamaður missti stjórn á bíl sínum í lausamöl með þeim afleiðingum að hann valt út af veginum. Í ályktuninni kemur einnig fram að viðhaldskostnaður bifreiða fyrir íbúa sé farinn upp úr öllu valdi en margir íbúar sækja sér vinnu annað og þurfa því reglulega að keyra veginn.

„Við erum með Vegagerðina hérna og þau reyna að þjónusta veginn eftir bestu getu. Þessi vegur er 14 prósent af malarvegum sem að Vegagerðin á að sjá um og ef við tökum saman heildarfjármagn þá erum við alveg að fá meira en fjórtán prósent af fjármagninu sem þau fá til að viðhalda þessum vegum. En málið er að við erum með rosalega mikið af ferðamönnum sem fer um veginn og hann er ekki að anna þessari umferð um veginn,“ segir Guðrún.

300 til 500 bílar á dag

Hún segir að þau hafi fengið aukafjárveitingu í fyrra sem hafi farið í að fylla upp í veginn, en hann sé í raun verri eins og staðan er núna.

„Yfir sumartímann í fyrra þá voru tölurnar ekki að fara undir 300 bíla á dag og flesta daga eru þær að banka í 500. Á þessum vegi, miðað við aðra malarvegi, þá er miklu meiri umferð en er á öðrum malarvegum,“ segir Guðrún.

Hún segir að ef vegurinn væri einungis nýttur af heimamönnum þá myndi hann líklega ekki vera svona, en ferðamenn, á leið sinni í Hvítserk og Selin, aki hann daglega og þau deili honum því með honum.

Að sögn Guðrúnar var ályktun fundarins  send til samgönguráðherra og annarra sem málið varðar eins og þingmanna kjördæmisins, forsætisráðherra og samband sveitarfélaga á norðurlandi vestra í gær, föstudag. Hún segir að lokum að þau bíði spennt eftir svörum.  

Frá íbúafundi í vikunni Mynd/Guðrún Ósk Steinbjörnsdóttir

Ályktunina í heild sinni má sjá hér að neðan.

Fundur íbúa við þjóðveg 711 (Vatnsnes og Vesturhóp í Húnaþingi vestra) haldinn 10. október 2018 að Hótel Hvítserk í Vesturhópi.

Tildrög fundar þessa er afleitt ástand á vegi 711 og mættu íbúar frá flestum bæjum við veginn og þess má geta að margt var af ungu fólki sem býr á svæðinu. Miklar umræður urðu á fundinum og eru helstu niðurstöður þessar.

1. Þjóðvegur 711 er í afleitu ástandi enda viðhaldskortur háð honum árum saman og mikil umferð ferðamanna. Selaslóðir á vestanverðu Vatnsnesi og Hvítserkur að austanverðu helstu ferðamannastaðirnir.

2. Ekki hefur verið komið til móts við óskir heimamanna um endurbætur á veginum og fólk orðið afskaplega langþreytt á orðagjálfri ráðamanna sem virðast halda ákaflega fast um budduna og hlusta ekki á fólkið á svæðinu. Þess má geta að nú hefur hámarkshraði vegarins á kafla verið færður niður í 30 km án þess að neinar framkvæmdir eigi sér stað. Hlýtur að vera einsdæmi á Íslandi og sýnir í raun hve alvarlegt ástandið er orðið.

3. Mörg slys hafa orðið á þjóðvegi 711 undanfarin ár. Banaslys varð á veginum árið 2004 þegar ferðamaður missti stjórn á bíl sínum í lausamöl með þeim afleiðingum að hann valt út af veginum.

4. Farartæki heimamanna hafa fengið að kenna á ástandi vegarins og viðhaldskostnaður farið upp úr öllu valdi. Sama má segja um bíla þeirra sem sjá um skólaakstur. Benda má á að margir íbúar við þjóðveg 711 sækja vinnu annað til að drýgja tekjur enda sauðfjárræktarsvæði og fáir lifa á því eingöngu.

5. Foreldrar eru orðnir mjög uggandi um börn sín í skólaakstri á þessum vegi og eru mörg dæmi um að börn kasti upp á leiðinni. Eins eru börnin kvíðin fyrir ferðunum og eru lengi að jafna sig í skóla og heima í lok ferðar og eins hefur ferðatíminn lengst til muna. Þetta er að sjálfsögðu algerlega óviðunandi og má segja að þetta jaðri við barnaverndarmál.

6. Íbúar við þjóðveg 711 skora á stjórnvöld að bæta ástand vegarins þannig að ekki hljótist af frekara tjón á farartækjum og fólki. Ljóst er að ábyrgð stjórnvalda er mikil í öllu þessu máli og ekki hægt að víkja sér undan aðgerðum.

7. Foreldrar skólabarna á fundinum voru á því að skammt væri í að börn yrðu ekki send í skóla ef ástand vegarins verður ekki bætt verulega. Benda má á að slík aðgerð yrði algerlega á ábyrgð stjórnvalda sem með sinnuleysi sínu myndu þá hafa lögbundna skólagöngu af börnum á svæðinu. Slíkt væri sennilega fáheyrt, ekki síst í ríku samfélagi á 21. öld.

8. Fundurinn skorar á sveitarstjórn Húnaþings vestra að koma til liðs við íbúa við þjóðveg 711 með öllum ráðum og reyna að þrýsta á stjórnvöld að gera betur. Ábyrgð sveitarstjórnar er líka mikil í þessu máli. Eins hvetur fundurinn alla hagsmunaaðila í Húnaþingi vestra (s.s. ferðaþjónustuaðila) til að taka höndum saman með íbúum á Vatnsnesi og Vesturhópi og beita þrýstingi þar sem við á. Þetta sama á við um pólitíska flokka, ekki síst þá sem tilheyra stjórnarmeirihlutanum á Alþingi.

9. Ályktun þessi verður send til þeirra sem við á og eins mun verða haft samband við fjölmiðla til þess að sýna þungann í þessu máli.

10. Að lokum áréttar fundurinn ábyrgð stjórnvalda á þessu ástandi og skorar á þau að láta hendur standa fram úr ermum. Við vitum öll að það eru til peningar til að bæta úr og minnum á að líf og heilsa fólks verður ekki metin til fjár.

Fyrir hönd undirbúningsnefndar

Guðrún Ósk Steinbjörnsdóttir.

Athugasemdir

Auglýsing
Auglýsing

Tengdar fréttir

Innlent

Tekinn aftur á ríflega 130 á Reykjanesbraut

Innlent

Lög­reglan leitaði að „Stúfi“ í Bú­staða­hverfi

Innlent

Tekinn á 132 með vélsleðakerru í eftirdragi

Auglýsing

Nýjast

Segja asbest í barnapúðri Johnson & Johnson

Kældi brennandi bíl með snjó

Glæ­ný Boeing-þota nauð­lendir í Íran

Braust inn í bíl en eigandinn sat undir stýri

Ölvaður maður bjálaðist í vegabréfaskoðun

Ísland er dýrasta land í Evrópu

Auglýsing