Helga er menntuð bæði sem verkfræðingur og jógakennari og segir fólk hafa gaman af því að bera þessa tvo titla saman vegna augljósra andstæðna þeirra. „En raungreinaheimurinn og jógaheimurinn hafa báðir fylgt mér allt frá því ég var ung kona.“

Vendipunktur varð í lífi Helgu fyrir um þremur árum síðan en hún segist þá hafa upplifað kulnun í lífi og starfi sínu sem verkfræðingur og í framhaldi sagt starfi sínu lausu og einbeitt sér að jógakennslu sem hún starfar við enn í dag. Það var svo fyrir um einu og hálfu ári síðan að Helga fór að skoða það sem hún kallar meðvitaða kynhegðun og Tantra.

„Þessi vinna leiddi mig á endanum á námskeið sem ég sótti hér á landi. Þar opnaðist þessi heimur fyrir mér og ég náði að hreinsa ýmislegt gamalt út og kynntist sjálfri mér sem kynveru upp á nýtt. Ég varð frjáls í eigin skinni, bæði sem kynvera og sem manneskjan Helga en þetta hangir allt saman.“

Öll með hömlur og bælingar

Helga hefur síðan haldið þrjú 6 vikna námskeið undir yfirskriftinni Kvenleiki, nánd, kynorka. „Mín reynsla er sú að við erum öll, bæði karl- og kvenkyns erum að burðast með skömm, hömlur og bælingar í tengslum við það að vera kynvera. Ég þekki þó reynsluheim kvenna betur og veit hvaða sársauka við berum oft á tíðum. Ég er viss um að karlmenn finni fyrir svipuðum tilfinningum en ekki af sama meiði. Karlar hafa upplifað pressu á að standa sig alltaf, vera alltaf graðir og alltaf til. Ef þeir eiga marga bólfélaga eru þeir flottir en annars ekki.

Í okkar samfélagi er það aftur á móti helst drusluskömmun sem konur burðast með. Ég er að verða fertug og mín upplifun og kvenna á mínu reki er mikið á þá leið að ekkert var talað um kynlíf á okkar yngri árum og lítið var um fræðslu. Við áttum alls ekki að vera kynferðislega virkar og ef við vorum það vorum við stimplaðar druslur. Stundum blandast ofbeldi og áreitni inn í þessa skömm og óttinn við að einhver geri manni eitthvað sem maður ekki vill. Í mínu tilfelli hefur aðalvinnan falist í því að skammast mín ekki fyrir að vera kynvera.“

Sælustund með sjálfum sér

Helga segir aðalráð sitt til annarra kvenna vera að kynnast sjálfum sér. „Ég segi þeim að kafa djúpt í hvað þær í raun vilji og hvet þær verða sinn eigin besti elskhugi. Við erum margar bara búnar að kanna kynlíf með öðrum. Við höfum kannski stundað sjálfsfróun sem einfalda losun ef okkur leiðist eða eigum t.d. erfitt með að sofna.

En ég hvet konur til að nálgast sjálfar sig sem elskhuga. Það er langur vegur á milli sjálfsfróunar og því að eiga sælustund með sjálfum sér. Ég mæli með því að byrja að snerta sig af meiri næmni. Ekki einblína á kynfærin. Það má til dæmis kyssa sjálfan sig, á handarbakið eða einhvern annan stað sem maður nær á. Þetta er stórt skref fyrir marga.

Að leyfa sér að upplifa þessa snertingu með núvitundarnálgun á sælu, snertingu og skynjun. Oft er þetta svolítið óyfirstíganlegt verkefni, að eiga að gæla við sig í 20 mínútur.“

Helga segir að þá megi taka minni skref með því t.a.m einbeita sér að því hvernig maður ber á sig líkamskrem. „Gera það af alúð en ekki í flýti. Hvernig myndi maður bera krem á elskhuga sinn? Eða t.d að gera sturtuferðina að skynjunarleik og leyfa sér að koma við líkama sinn og skynja hann. Þessar æfingar eru með það að markmiði að kynnast sjálfum sér og þegar við höfum komist að því hvað okkur sjálfum finnst gott getum við miðlað því til okkar elskhuga. Þá þarf maður að æfa sig í að segja upphátt hvað maður vill og hvað ekki.“

Helga hvetur fólk til að verða sinn eigin besti elskhugi og æfa sig í að segja hvað það vill og hvað það vill ekki þegar kemur að kynlífi. Fréttablaðið/Ernir

Eiginmaðurinn upplifði ótta

Helga viðurkennir að eiginmanni hennar til 12 ára hafi upphaflega þótt það skrítið þegar hún sagðist ætla að fara á krassandi vikunámskeið í Tantraskóla. „Hann upplifði auðvitað mismunandi litróf tilfinninga, hvatti mig til að gera það sem ég vildi en óttaðist jafnframt að á milli ykkar gæti myndast ákveðið bil. Að ég myndi fjarlægjast hann.“

Helga segir óttann þó hafa verið ástæðulausan og hún hafi komið til baka bæði saklausari og forvitnari. „Ég upplifði meira sakleysi því ég var búin að losa mig við svo mikla skömm, var hætt að skammast mín fyrir að vera kynvera. Ég kom því með þetta heilbrigða sakleysi og forvitni að hans líkama og það kom strax fallegur og ferskur vindur inn í okkar samlíf. En þetta er líka flókið, að annar aðilinn sé allt í einu kominn inn í alls konar tantra pælingar og er þannig ljósárum á undan á vissum sviðum. Maður getur ekkert komið heim og dömpað öllu á makann og ég viðurkenni alveg að þetta ferli er alveg búið að vera upp og niður enda hefur þetta í raun breytt því hver ég er.“

Er ekki ein í þessari byltingu

„Ég leyfi mér að finna það sem kemur yfir mig hvort sem það er gleði, sorg, reiði eða kynlöngun. Það er ekki lengur neitt innra með mér sem segir mér að tilfinningin sé ekki viðeigandi. Svo auðvitað er ég farin að upplifa sælu ein með sjálfri mér, en ég hefði aldrei getað ímyndað mér hvert unaður og sæla gætu farið. Mér finnst ég ótrúlega frjáls. Ég veit að ég má finna allt – ég verði ekkert hættuleg,“ segir Helga og hlær.

„Þarna kemur aftur þessi drusluskömmun og óttinn við að við það að við það að leysa kynorkuna úr læðingi verði maður eitthvað skrímsli með brókarsótt. Ég er alls ekkert ein í þessari byltingu, það eru alltaf að poppa upp fleiri námskeið og erindi sem stuðla að því að við séum frjálsari í eigin skinni. Ég held að næsta ástarbylting sé að hefjast.“