Katrín Jakobsdóttir, forsætisráðherra, segir að ríkisstjórn Íslands, geri sér grein fyrir því að stúdentar geti verið í erfiðri stöðu næstu mánuðina og boðar aðgerðir sem miða að því að bæta stöðu þeirra.

„Stúdentar hafa undanfarið bent á þá erfiðu stöðu sem mun blasa við námsfólki í sumar þegar allt lítur út fyrir að fá sumarstörf verði í boði. Við þekkjum það flest hvað við reiðum okkur mikið á sumarvinnuna á þessu tímabili í lífinu og þess vegna tek ég undir með stúdentum um mikilvægi þess að bregðast við stöðunni," segir Katrín í færslu á facebook-síðu sinni.

„Ég tel að það besta sem við getum gert sé að skapa ný störf fyrir stúdenta þar sem þau hafa tækifæri til að nýta krafta sína og þekkingu. Þess vegna skiptir tillaga fjárlaganefndar um að 100 milljónir fari í Nýsköpunarsjóð námsmanna til þess að búa til störf í sumar ótrúlega miklu máli," segir forsætisráðherrann enn fremur.

„Sem menntamálaráðherra tók ég þátt í að stórefla sjóðinn á árunum eftir hrun og sú efling skilaði miklu. Ég hlakka bæði til að greiða atkvæði með tillögunni á eftir og sjá afrakstur þeirra verkefna sem stúdentar munu vinna í sumar," segir hún.