Stjórn Brynju leigufélags hefur ákveðið að frysta leiguverð næstu þrjá mánuði í ljósi mikillar verðbólgu á þessu ári. Leigan mun því haldast óbreytt frá nóvember 2022, en allir leigusamningar félagsins eru bundnir vísitölu neysluverðs til verðtrygginga. Þetta kemur fram í fréttatilkynningu frá Brynju leigufélagi.

Brynja á og rekur íbúðarhúsnæði fyrir öryrkja, en leigufélagið á og rekur yfir 850 eignir víða um land.

Þá segir að viðskiptavinir Brynju þurfi að kljást við hækkandi verðbólgu og vexti eins og flestir landsmenn. Mánaðarleg leiga hafi hækkað um 8,3 prósent á þessu ári, sem svari til þess að búið sé að bæta þrettánda mánuðinum við árið.

„Verðbólga og hækkandi vextir setja þrýsting á alla í samfélaginu, en mest þó á þá sem hafa minnst á milli handanna. Eitt mikilvægasta hagsmunamál Brynju og leigjenda félagsins er að viðhalda lágri verðbólgu og lágum vöxtum,“ segir Guðbrandur Sigurðsson, framkvæmdastjóri Brynju leigufélags.