Stjórnir Barnaheilla og Blátt áfram hafa ákveði að sameina samtökin undir nafni Barnaheilla - Save the Children á Íslandi.  Fram kemur í tilkynningu frá samtökunum að verkefni Blátt áfram muni með sameiningunni verða hluti af starfsemi Barnaheilla sem snýr að vernd barna gegn ofbeldi. Með sameiningunni verði hægt að samnýta krafta beggja samtaka að því sameiginlega markmiði að berjast gegn ofbeldi gegn börnum.

„Samtökin vilja með þessu sýna gott fordæmi og trúa því að sameinuð séu þau sterkari rödd og öflugra hreyfiafl með þekkingu og reynslu innanborðs. Þau geti því frekar náð fram enn meiri árangri í baráttunni gegn ofbeldi á börnum en hingað til,“ segir í tilkynningunni.

Sigríður Björnsdóttir, formaður Blátt áfram, segir  að hún telji sameininguna vera mikilvæg skilaboð til samfélagsins um að þau séu ávallt að leita leiða til að vera enn sterkari málsvarar barna.

„Með þessu skrefi er verið að samnýta krafta og þekkingu félaganna, með sameinuðum kröftum erum við enn öflugri málsvarar fyrir börn. Barnaheill eru virt samtök á alþjóðavísu og við teljum að verkefni Blátt áfram muni dafna innan raða Barnaheilla.“ segir Sigríður.

„Barnaheill verða áfram ein öflugustu frjálsu félagasamtökin á Íslandi sem vinna að vernd barna gegn ofbeldi og forvörnum á því sviði.  Blátt áfram hafa unnið gríðarlega gott starf varðandi vernd gegn kynferðisofbeldi á börnum. Við erum mjög stolt af því að þau sameini starfsemi sína Barnaheillum.”  segir Harpa Rut Hilmarsdóttir formaður Barnaheilla.

Framkvæmdastjóri Barnaheilla verður áfram Erna Reynisdóttir en við starfslið Barnaheilla bætast þrír starfsmenn frá Blátt áfram. Stefnt er að því að sameina starfsemi samtakanna tveggja í nýju húsnæði á þessu ári.