Blaðamannafélag Íslands íhugar að kvarta undan stjórnsýslu fjölmiðlanefndar til umboðsmanns Alþingis. Þetta kemur fram á vef félagsins. Þar segir að gagnrýni félagsins beinist að beitingu nefndarinnar á 26. grein fjölmiðlalaga, sem snýst um lýðræðislegar grundvallarreglur. Í greininni segir meðal annars að fjölmiðlaveita skuli uppfylla kröfur um hlutlækni og nákvæmni í fréttum og gæta þess að mismunandi sjónarmið komi fram, jafnt karla sem kvenna.

Á vef BÍ segir að nefndin hafi fyrr í vetur birt álit á efni fjölmiðla í kjölfar kæra sem nefndinni hafi borist. Með því sé nefndin komin langt út fyrir valdsvið sitt og sé að fara á svig við vilja löggjafans eins og hann birtist þegar fjölmiðlalögin urðu að lögum. Ekki hafi verið ætlunin við lagasetninguna að setja tjáningarfrelsi íslenskra fjölmiðla skorður. „Blaðamannafélagið telur að nú hafi fjölmiðlanefnd farið út fyrir þau valdmörk sem þar er að finna.“

BÍ telur það stórlega ámælisverð stjórnsýsla af hálfu fjölmiðlanefndar að birta álit eingöngu á umræddri lagagrein án þess að setja nokkrar formreglur um það hvaða skilyrði kærur þurfa að uppfylla til að teljast tækar fyrir nefndinni. 

„Þannig virðist nefndin líta svo á að allt birt efni í íslenskum fjölmiðlum sé á valdviði nefndarinnar og enginn áskilnaður er um aðild kærenda, fyrningu eða að reynt hafi verið að krefjast leiðréttingar á kærðri umfjöllun eins og finna má í siðareglum BÍ. Engin ákvæði hér að lútandi er að finna í starfsreglum nefndarinnar, enda eru starfsreglurnar settar áður en nefndin fékk heimild til að birta álit samkvæmt breytingu á fjölmiðlalögum sem samþykktar voru 2013. Það vekur furðu að stjórnvald á tilteknu sviði í íslensku samfélagi skuli ekki gera meiri kröfur til eigin stjórnsýslu og réttaröryggis þeirra sem starfa á því sviði.“