Björgunarsveitir á Suðurlandi voru kallaðar út klukkan 19:21 í kvöld eftir að tilkynning barst til Neyðarlínunnar um bíl sem var fastur á Mælifellssandi, rétt norður af Mýrdalsjökli.
Þrennt var í bílnum sem var á vesturleið um hálendið er hann festist í snjó. Þar sem lélegt símasamband var á svæðinu þurfti fólkið að ganga nokkurn spöl til að komast í samband og óska eftir hjálp.
Sambandið var þó slitrótt en þeim tókst þó að láta vita að þau væru ekki við bílinn. Þau gáfu upp staðsetningu en ekki var vitað hvort það væri staðsetning bílsins eða þeirra.
Af þessum sökum voru kallaðar út nokkrar björgunarsveitir og þær sendar á Mælifellssand úr tveimur áttum, þar sem talin var möguleiki á því að fólkið væri ekki við bílinn og að leita þyrfti að því.
Rétt upp úr níu kom björgunarsveitarfólk að bílnum og fann öll þrjú um borð í bílnum. Nú er verið að draga bílinn úr snjónum og mun björgunarsveitarfólk fylgja hópnum til byggða í austurátt að því er segir í tilkynningu frá Landsbjörg.
