Björgunarsveitir frá Höfn í Hornafirði og Öræfum voru kallaðar vegna konu sem hafði slasast í Fremri Veðurárdal, austan við Breiðmerkurjökul. Kemur þetta fram í tilkynningu frá Slysavarnafélaginu Landsbjörg.
Björgunarsveitin var kölluð út klukkan hálf ellefu, en konan var á göngu með hóp að íshelli í jöklinum þegar hún hrasaði á blautri klöpp og slasaðist á fæti.
Þá kemur einnig fram í tilkynningunni að Þjóðgarðsverðir séu einnig rétt ókomnir á vettvang og stutt er í sjúkraflutningamenn. Mikil bleyta sé á svæðinu og er mikið vatn í ám og lækjum.
Bera þarf konuna að björgunarsveitarbíl við nokkuð erfiðar aðstæður.
