Bjarni Már Júlíusson, fyrrverandi framkvæmdastjóri Orku náttúrunnar, vonar að með úttekt Innri endurskoðunar linni atlögum að mannorði hans. Þetta kemur fram í yfirlýsingu sem Bjarni Már Júlíusson hefur sent á fjölmiðla.

Sjá einnig: Uppsögn Áslaugar Thelmu metin réttmæt

Í dag kom fram að uppsagnir Áslaugar Thelmu Einarsdóttur og hans sjálfs hafi verið réttmætar. „Það er mér léttir að skýrsla Innri endurskoðunar Reykjavíkurborgar liggur nú fyrir og staðfestir að uppsögn starfsmanns ON sem mestur styrr hefur staðið um var réttmæt og byggði á faglegu mati.“

Hann segir að fyrirvaralaus uppsögn sín hafi verið óverðskulduð og meiðandi. „og til hennar gripið í skyndi án þess að mér væri gefinn kostur á að útskýra mitt mál. Það fundust mér kaldar kveðjur eftir 6 ára farsæl störf í þágu OR/Orku náttúrunnar.“

Sjá einnig: Áslaug THelma vissi ekkert um úrskurðinn

Hann segir að málið hafi verið ömurleg reynsla fyrir hann og fjölskyldu sína. Vegið hafi verið að mannorði hans með útfærðum spuna. „sem dreift var á rétta staði til að ná sem mestri fylgni við einhliða og óstaðfesta frásögn af málsatvikum.

Yfirlýsingin í heild:

Yfirlýsing í tilefni af skýrslu Innri endurskoðunar um ON

Það er mér léttir að skýrsla Innri endurskoðunar Reykjavíkurborgar liggur nú fyrir og staðfestir að uppsögn starfsmanns ON sem mestur styrr hefur staðið um var réttmæt og byggði á faglegu mati. Þá er það ein af niðurstöðum skýrslunnar að ásakanir um mismunun á grundvelli kynferðis og um kynferðislegt áreiti í samskiptum mínum við samstarfsfólk eiga ekki við nein rök að styðjast.

Fyrirvaralaus uppsögn mín úr starfi framkvæmdastjóra ON var hins vegar að mínu mati bæði óverðskulduð og meiðandi og til hennar gripið í skyndi án þess að mér væri gefinn kostur á að útskýra mitt mál. Það fundust mér kaldar kveðjur eftir 6 ára farsæl störf í þágu OR/Orku náttúrunnar.

Það hefur verið ömurleg reynsla fyrir mig og fjölskyldu mína að fylgjast með hvernig vegið var að mannorði mínu með vandlega útfærðum spuna, sem dreift var á rétta staði til að ná sem mestri fylgni við einhliða og óstaðfesta frásögn af málsatvikum.

Ég vona að með niðurstöðum úttektar Innri endurskoðunar linni atlögum að mannorði mínu og óhróðri um minn fyrrverandi vinnustað.

Reykjavík 19. nóvember 2018

Bjarni Már Júlíusson

fyrrverandi framkvæmdastjóri Orku náttúrunnar