Kötturinn Birta týndist fyrir fjórum dögum síðan úti á Akra­nesi en sem betur fer fannst hún í gær. Það væri ekki í frá­sögur færandi ef ekki væri fyrir þá stað­reynd að hún fannst úti á Kárs­nesi í Kópa­vogi.

Eig­andinn, Hulda Guð­björns­dóttir, segir í sam­tali við Frétta­blaðið að málið sé allt hið dular­fyllsta. „Ég veit ekki hvað gerðist, kötturinn finnst bara í Kópa­vogi,“ segir Hulda létt í bragði. Hún segir að Birta sé þrátt fyrir allt í góðri heilsu.

„Hún er bara hress. Hún alla­vega vildi ekki ræða Kópa­vog,“ segir Hulda. Íbúi á Kárs­nesi í Kópa­vogi vakti at­hygli á Facebook í gær á því að Birta væri fyrir utan hjá sér. Lýsti hann henni sem gæfri og góðri kisu, sem væri greini­lega ekki að fara neitt.

Vin­kona Huldu, Birna Páls­dóttir, vekur at­hygli á ferða­lagi Birtu inni á í­búa­hóp Akra­nes­bæjar og varar hún katta­eig­endur við því að fylgjast vel með dýrunum sínum. „Passið ykkur á kattar­þjófinum hér á skaganum, sem rænir köttum og fer með þá í Kópa­voginn. Týndist köttur frá vin­konu minni og hann fannst í Kópa­vogi í gær.“

Lýst eftir Birtu á hópnum.
Fréttablaðið/Skjáskot