Jón Bald­vin Hannibals­son fyrr­verandi ráð­herra sendi fimm­tán ára gamalli stúlku bréf og átti í kyn­ferðis­legum sam­skiptum við hana árið 1970. Það kemur fram í bréfum og dag­bókar­færslum sem Stundin birtir í dag. Stúlkan hét Þóra Hreins­dóttir og lést árið 2016.

Á þeim tíma sem Jón Bald­vin átti í sam­skiptum við hana var hann kennari hennar í Haga­skóla og var 31 árs gamall fjögurra barna faðir. Fram kemur í bréfunum sem Stundin birtir að hann vilji stinga af með henni og liggja í kjöltu hennar.

Í Stundinni, sem kom út í dag, eru teknar saman þær fjölda á­sakana sem fram hafa komið um meinta kyn­ferðis­lega á­reitni Jóns Bald­vins gegn fjölda kvenna um ára­bil og við­brögð hans við þeim. Þar kemur einnig fram að við­brögð Jóns Bald­vins við birtingu bréfanna og dag­bókar­færslnanna hafi verið að spyrja hvaða til­gangi það þjóni að grafa upp 50 ára gamla dag­bókar­færslu ung­lings­stúlku til að gefa í skyn eða vekja grun­semdir um að sam­skipti hennar við kennarann hennar hafi mögu­lega verið af kyn­ferðis­legum toga.

Þá kemur fram í um­fjöllun Stundarinnar að auk þess að hafa í fórum sínum bréf Jóns Bald­vins til Þóru og dag­bókar­færslur hennar þá hafi þau sann­reynt það sem kemur fram þar með gögnum frá Haga­skóla og með við­tölum við fjöl­skyldu hennar og skóla­systur hennar.