Vél Icelandair, sem lagði af stað til San Francisco nú síðdegis, hefur verið snúið við vegna bilunar. Vélin hringsólar nú suðvestur af Reykjanesi.

Guðjón Arngrímsson, upplýsingafulltrúi Icelandair, segir að vélinni verði lent klukkan átta. „Hún er að létta sig fyrir lendingu.“ Vélin er af gerðinni Boeing 767-319.

Honum er ekki kunnugt um hvers konar bilun er um að ræða. Hann segir að vélin muni lenda öryggislendingu á Keflavíkurflugvelli, í samræmi við hefðbundið verklag.

Önnur vél er til taks á Keflavíkurflugvelli, sem mun flytja farþegana á áfangastað. 

Uppfært: Vélin er lent á Keflavíkurflugvelli, heil á höldnu. Verið er að undirbúa aðra vél fyrir flugið. „Það ætti að ganga hratt fyrir sig,“ segir Guðjón við Fréttablaðið.