Samtök iðnaðarins vonast til að Alþingi setji reglur um innviðagjald sveitarfélaga eftir að Hæstiréttur dæmdi þau lögleg á miðvikudag. Verktakinn Sérverk höfðaði málið gegn Reykjavíkurborg vegna gjaldanna sem innheimt voru á uppbyggingarreit í Vogabyggð.

Krafan var 120 milljónir króna en borgin hafði betur á öllum dómstigum.

„Dómurinn virðist veita sveitarfélögum ríka heimild til innheimtu gjalda og er í þessu samhengi vísað til markaðsforsendna. Þau geta hagað sér eins og einkaaðilar en þó er skýrt tekið fram að um þau gilda reglur um meðalhóf og jafnræði,“ segir Jóhanna Klara Stefánsdóttir, sviðsstjóri mannvirkjasviðs Samtaka iðnaðarins.

Dagur B. Eggertsson borgarstjóri hefur lýst yfir ánægju með niðurstöðuna á samfélagsmiðlum og sagt mikið hafa verið undir.

„Því viðhorfi að verktakar ættu að geta hirt allan gróðann af umbreytingu borgarinnar en skilið kostnaðinn við endurnýjun hverfanna eftir hjá samfélaginu hefur algerlega verið hafnað,“ sagði hann.

„Það er núna í höndum íbúa Vogabyggðar að ganga á eftir að þeir fái þá innviði sem gjaldið átti að dekka, enda er skylda borgarinnar til að standa við sínar skuldbindingar skýr,“ segir Jóhanna.

Segir hún það hafa skapað tortryggni að gjaldið sé ekki það sama á öllum uppbyggingarreitum og upphæðirnar mismunandi.

Í síðasta mánuði skilaði starfshópur Húsnæðis- og mannvirkja­stofnunar tillögum þar sem vikið var að innviðagjaldinu og hugsanlegri lagasetningu.

„Þetta undirstrikar að okkar mati þörfina á því að koma þessum málum í betra horf,“ segir Jóhanna