Margir íslenskir víninnflytjendur og áfengisframleiðendur hafa hug á því að hefja sölu á áfengi á netinu líkt og netverslanirnar Bjórland, Sante Wines og Nýja vínbúðin.

Félag atvinnurekenda (FA) hefur óskað eftir svörum frá stjórnvöldum fyrir hönd nokkurra fyrirtækja um hvort starfsemi sem þessi sé lögleg eða ekki en ekki fengið svar.

„Stjórnvöld hafa ekki með neinum hætti gripið inn í starfsemi þessara fyrirtækja. Þá er hægt að draga þá ályktun að starfsemin sé lögleg. Fjármálaráðherra hefur meira að segja sagt það að hann sjái ekki annað en að starfsemin sé lögleg,“ segir Ólafur Stephensen, framkvæmdastjóri FA.

Skrítin staða uppi

Áfengis- og tóbaksverslun ríkis­ins hefur kært slíka starfsemi til lögreglu og skattyfirvalda.

„Undirstofnun fjármálaráðuneytisins, Áfengis- og tóbaksverslun ríkisins, hefur hins vegar farið fram með býsna mikilli hörku gagnvart netverslunum og kært bæði til lögreglu og skattayfirvalda,“ segir Ólafur. „Þarna er skrítin staða uppi. Ráðamenn segjast ekki sjá annað en að starfsemin sé lögleg en opinber stofnun stendur í því að kæra menn. ÁTVR virðist þannig vísvitandi vinna gegn fyrirsjáanleika og öryggi í viðskiptum með þessa löglegu vöru.“

Hikað við að fara út í samkeppni

Staðan hefur haft þau áhrif að fyrirtæki hafa hikað við að fara út í samkeppni á þessum markaði. „Menn vilja ekki eiga yfir höfði sér lögreglurannsóknir og hafa áhyggjur af orðsporinu. Við höfum farið fram á það við stjórnvöld að þau taki af vafa um að þetta sé lögleg starfsemi.“

FA sendi fyrst bréf á fjármála- og efnahagsráðuneytið fyrir meira en mánuði, eftir ítrekun var bréfið áframsent á dómsmálaráðuneytið þar sem erindið liggur ósvarað tveimur vikum síðar. „Okkur finnst þetta sérkennilegt. Stjórnvöld hafa leiðbeiningarskyldu gagnvart fyrirtækjunum, auk þess sem gera verður kröfu um að þau leiðrétti rangfærslur undirstofnana sinna. Það eru margir sem hafa hug á því að taka þátt í samkeppninni á þessum nýja markaði en vilja vera vissir um að það sé innan ramma laga og reglna. Það er skylda stjórnvalda að leiðbeina fyrirtækjum um það.“