Allsherjar- og menntamálanefnd Alþingis heldur opinn fund þriðjudaginn 17. maí í húsnæðis nefndasviðs Alþingis í Austurstræti 8-10 og hefst hann kl. 9:10. Fundarefnið er fræðsla og menntun lögreglumanna um fjölmenningu og fordóma. 

Gestir fundarins verða Sigríður Björk Guðjónsdóttir ríkislögreglustjóri og Ólafur Örn Bragason, forstöðumaður mennta- og starfsþróunarseturs lögreglunnar.

Að sögn formanns nefndarinnar, Bryndísar Haraldsdóttur, var það fulltrúi Pírata í nefndinni, Arndís Anna Kristínar Gunnarsdóttir, sem óskaði eftir því að fundurinn yrði haldinn. Arndís Anna óskaði þess að fundurinn yrði haldinn eftir að Lögreglan á höfuðborgarsvæðinu stöðvaði í tvígang ungan svartan dreng, í annað skiptið með sérsveit ríkislögreglustjóra, í leit sinni að strokufanganum Gabríel Duane Boama.

Bryndís sagði í gær í svari til Fréttablaðsins að ekki hafi verið hægt að halda fundinn fyrr en nú en tæpur mánuður er frá því að málið kom upp.

Hægt er að horfa á fundinn hér að neðan.