Barnaland, barnagæsla sem rekin er af Smárabíó í Smáralind, lokar tímabundið eftir að barn komst út úr gæslunni um helgina. Í yfirlýsingu frá Senu, er eigandi og rekstraraðili Barnalands, segir að gæslan loki á meðan málið verði tekið til ítarlegrar skoðunar og verkferlar bættir til að tryggja að slíkt gerist ekki aftur.

„Starfsfólk og forráðamenn Barnalands eru miður sín yfir atvikinu enda ekkert mikilvægara en öryggi barna sem þangað koma. Um leið og öryggismál hafa verið tryggð, verður Barnaland opnað að nýju. Þangað til biðjumst við velvirðingar á þessari tímabundnu lokun,“ segir í yfirlýsingunni.

Barnið fannst eftir leit í Hagkaup en fjölskyldufaðirinn deildi færslu á Facebook í gær þar sem hann sagði frá því að hann og konan hans hafi skilið dóttur þeirra eftir í gæslunni í klukkustund.

Þegar þau komu aftur og ætluðu að leyfa henni að vera klukkustund í viðbót tóku þau eftir því að skórnir hennar voru ekki lengur á staðnum. Þau leituðu að henni á staðnum, í kastalanum, en finna hana ekki.

Hann segir í færslu sinni að starfsmennirnir hafi „yppt öxlum“ og haldið áfram að vinna.

„Í panikki hleyp ég og konan mín um smáralind að leita af barninu okkar og starfsmenn barnagæslunnar gerðu ekki handtak á meðan. Hringdum við á lögregluna sem kom mjög fljótt en leiðbeindu okkur að fara og finna öryggisverði sem starfsmenn gæslunnar höfðu ekki rænu á að gera. En á þjónustuborðinu var mér sagt að hún væri fundin í þjónustuborði Hagkaups,“ segir faðirinn.

Hann segir að eftir „stutt“ spjall við barnagæsluna hafi lögreglan komið á staðinn og tekið af þeim skýrslu.

Hann þakkar fyrir það að barnið hafi ekki farið lengra en í Hagkaup en miðað við færsluna þá var dóttir þeirra að leita að þeim.

„Hún ætlaði bara að finna okkur. Væri ekki ráð að fara að taka gæsluna í gegn þarna í smáralind eða loka búllunni? Endilega deilið eins og þið getið þetta bara má ekki gerast aftur. Næst verður það barn kannski ekki svona heppin,“ segir hann að lokum.