Mannanafnanefnd segir að þar sem mannsnafnið Aliverti sé hvorki dregið af íslenskum orðstofni né hafi unnið sér hefð í íslensku mál fái það ekki samþykki sem millinafn.

Erindi um nafnið Aliverti barst mannanafnanefnd fyrir tæpum fjórum mánuðum og kvað nefndin upp úrskurð sinn í gær. Í honum er tekið fram að til þess að heimilt sé að samþykkja nýtt millinafn þurfa öll skilyrði 6. greinar laga um mannanöfn að vera uppfyllt.Þau skilyrðin eru eftirfarandi:

Millinafn skal dregið af íslenskum orðstofnum eða hafa áunnið sér hefð í íslensku máli en má þó ekki hafa nefnifallsendingu.

Nöfn, sem aðeins hafa unnið sér hefð sem annaðhvort eiginnöfn karla eða eiginnöfn kvenna, eru ekki heimil sem millinöfn.

Millinafn skal ritað í samræmi við almennar ritreglur íslensks máls nema hefð sé fyrir öðrum rithætti þess.

Millinafn má ekki vera þannig að það geti orðið nafnbera til ama.

Auk þessa segir mannanafnanefnd millinöfn ekki mega vera ættarnafn í skilningi mannanafnalaga.

„Millinafnið Aliverti er hvorki dregið af íslenskum orðstofni né hefur það unnið sér hefð í íslensku máli. Nafnið uppfyllir þannig ekki ákvæði 6. gr. laganna,“ segir mannanafnanefnd.