Karlmaður fannst látinn í malarnámu suðaustanvert í Lambafelli við Þrengslaveg í morgun.

Neyðarlínu barst tilkynning um slysið klukkan 07:02. Þar reyndist jarðýta sem verið var að nota við að losa efni og ýta fram af fjallsbrúninni hafa farið fram af brúninni og ofan í námuna. Þetta kemur fram í tilkynningu frá lögreglunni á Suðurlandi.

Stjórnandi vélarinnar, íslenskur karlmaður á sextugsaldri, fannst skammt frá vélinni og reyndist látinn þegar að var komið.

Tildrög slyssins, sem talið er hafa átt sér stað á tímabilinu eftir klukkan 23:00 í gærkvöldi og til morguns, eru til rannsóknar hjá lögreglunni á Suðurlandi.

Að sögn hennar er ekki unnt að veita frekari upplýsingar um rannsóknina að svo stöddu.

Lögreglan óskar eftir upplýsingum frá vegfarendum sem fóru um Þrengslaveg á umræddum tíma, til að mynda hvort þeir hafi séð til vinnuvélarinnar.

Er fólki bent á að koma slíkum upplýsingum á framfæri í síma 444 2000, í tölvupósti á sudurland@logreglan.is eða á Facebook-síðu lögreglunnar á Suðurlandi.