Tuttugu farþegar eru um borð í ferjunni Baldri en hún er vélarvana um tíu sjómílur frá Stykkishólmi. Fram kemur í tilkynningu frá Eimskip að auk farþeganna er um borð átta manna áhöfn.

Baldur varpaði akkerum fljótlega eftir að bilunarinnar varð vart til að hindra rek. Samkvæmt tilkynningu Landhelgisgæslunnar halda akkerin vel. Vindátt er úr norðaustri og ef rek yrði á skipinu ræki það frá landi og grynningum. Ástandið um borð er tryggt en til að gæta fyllsta öryggis var þyrlusveit Landhelgisgæslunnar einnig kölluð út og verður í viðbragðsstöðu ef á þarf að halda.

Varðskipið Þór, rannsóknarskipið Árni Friðriksson og sjóbjörgunarsveitir á vegum Slysavarnafélagsins Landsbjargar voru kallaðar út á þriðja tímanum í dag vegna Breiðafjarðarferjunnar Baldurs sem varð vélarvana mitt á milli Flateyjar og Stykkishólms.

Í tilkynningu Landhelgisgæslunnar um málið segir að þau hafi fengið tilkynningu um bilunina klukkan 14:27.

Rannsóknarskipið Árni Friðriksson verður kominn að Baldri á fimmta tímanum og er gert ráð fyrir að ferjan verði tekin í tog til Stykkishólms.

Varðskipið Þór er jafnframt á leið á staðinn en skipið var statt í Helguvík þegar útkallið barst.

Myndin er tekin um borð í Þór þegar skipið lagði af stað frá Helguvík.
Mynd/Landhelgisgæslan