Ein af helstu perlum Víknaslóða er Brúnavík sem liggur sunnan Borgarfjarðar eystra. Hún ber nafn með rentu því sléttur Brúnavíkursandurinn er fallega brúnn líkt og líparítklettar upp af honum sem kallast Hrafnaklettar.
Ef ekki væri fyrir kaldan sjóinn og óstöðugt veðurfar væri þarna fullkomin baðströnd sem gæfi þeim í suðrænum löndum ekkert eftir, enda skartar Brúnavík tignarlegum fjallgörðum beggja vegna sem enda yst í sæbröttum hömrum. Upp af Brúnavík er síðan mikill og fjölbreyttur gróður með heiðum þar sem fífa umlykur litlar tjarnir.
Í Brúnavík var löngum tvíbýli, enda tiltölulega snjólétt og tún og engjar sem hentuðu vel til búskapar. Þarna var líka lending og stutt á fengsæl fiskimið sem gerði ábúendum kleift að stunda útræði meðfram búskap.
Það er auðveldast að komast í Brúnavík gangandi og liggur algengasta gönguleiðin austan sérlega reisulegs líparítfjalls, Geitfells (587 m). Er þá lagt af stað við sjónvarpsmastur á Ölduhamri í Borgarfirði og gengið þaðan um Brúnavíkurskarð sem liggur í 360 m hæð. Efst býðst frábært útsýni til Dyrfjalla og Dyrfjallatinds en einnig sést vel yfir Borgarfjörð. Stuttu síðar blasir litrík Brúnavík við með einkar snoturri ströndinni.
Á leiðinni niður í Víkina er gengið fram hjá eyðibýlunum uns sést í neyðarskýli SVFÍ. Þar er vaðið eða stiklað yfir Brúnavíkurá sem rennur eftir dalnum og út í Víkina. Þarna má kasta mæðinni en í góðu veðri er tilvalið að skella sér í sjósund og jafnvel ná smá sólbrúnku. Saltan sjóinn má síðan skola af sér í litlum fossi í fyrrnefndri á. Ganga fram og til baka úr Borgarfirði í Brúnavík er 12 km og má hæglega ná á einum degi, og er busl í sjónum þá innifalið. Í stað þess að ganga sömu leið til baka er valkostur að ganga upp með Brúnavíkurá að Brotagili. Þar er göngubrú yfir ána og vegslóða síðan fylgt yfir Hofstrandarskarð í Borgarfjörð.
Einnig má ganga utar úr Brúnavík yfir Hafnarskarð að bænum Höfn sem er ysti bærinn í Borgarfirði. Sprækt göngufólk ætti hins vegar að þræða áfram Víknaslóðir á nokkrum dögum og skoða í leiðinni næstu perlur í hálsfesti Víknaslóða, Kjólsvík og Breiðuvík.
