Tæplega 61% þeirra sem tóku afstöðu segjast styðja ríkisstjórnina, sem er aukning um nær þrjú prósentustig milli mælinga. Þetta kemur fram í þjóðarpúls Gallups.
Helstu breytingar á fylgi flokka eru þær að fylgi Miðflokksins eykst um rúmlega tvö prósentustig milli mælinga, en fylgi Samfylkingarinnar minnkar um tæplega tvö prósentustig. Tæplega 10% segjast myndu kjósa Miðflokkinn færu kosningar til Alþingis fram í dag og næstum 13% segjast myndu kjósa Samfylkinguna. Litlar breytingar eru á fylgi annarra flokka milli mælinga, eða á bilinu 0,1-1,1 prósentustig.
Slétt 23% segjast myndu kjósa Sjálfstæðisflokkinn, ríflega 12% Vinstri græn, tæplega 12% Pírata, liðlega 11% Framsóknarflokkinn, tæplega 10% Viðreisn, 5% Flokk fólksins og sama hlutfall Sósíalistaflokk Íslands. Tæplega 11% taka ekki afstöðu eða vilja ekki gefa hana upp og liðlega 8% segjast myndu skila auðu eða ekki kjósa.
Spurt var:
Ef kosið yrði til Alþingis í dag, hvaða flokk myndir þú kjósa?
En hvaða flokkur yrði líklegast fyrir valinu?
Hvort er líklegra að þú kysir Sjálfstæðisflokkinn eða einhvern hinna flokkanna?
Styður þú ríkisstjórnina?
Niðurstöður sem hér birtast um fylgi flokkanna á landsvísu eru úr netkönnun sem Gallup gerði dagana 1. til 29. mars 2021.
Heildarúrtaksstærð var 9.856 og þátttökuhlutfall var 53,0%. Vikmörk á fylgi við flokka eru 0,7-1,3%. Einstaklingar í úrtaki voru handahófsvaldir úr Viðhorfahópi Gallup.
